Ils hotels grischuns han dumbrà 5,4 milliuns pernottaziuns l’onn passà. Quai è in minus da 2,5 pertschient cumpareglià cun il 2022, tenor las cifras da l’Uffizi federal da statistica. Las cifras da l’entira Svizra mussan percunter in nov record, cun 41,8 milliuns pernottaziuns.
Mo paucas destinaziuns grischunas han pudì emplenir meglier ils letgs il 2023, cumpareglià cun l’onn avant. La destinaziun Partenz ha nudà gist 10,5% dapli pernottaziuns, e Cuira in plus da 9%. Tuttina bain han lavurà las destinaziuns Lai ed Arosa. E la pli gronda reducziun da pernottaziuns sto magunar la destinaziun Flem Laax, cun in minus da 13,1%.
Nov record per la hotellaria svizra
Cun 41,8 milliuns pernottaziuns il 2023, han ils hotels svizzers surpassà per l’emprima giada la marca da 40 milliuns. Enfin uss era l’onn 2019 stà il pli ferm – cun 39,6 milliuns. La crisa pervi da la pandemia da corona è uschia definitivamain passà.
Procurà per il bun resultat svizzer han ils turists da l’ester, quels han procurà per var 22% dapli pernottaziuns il 2023. Lev enavos è percunter ida la cifra da las pernottaziuns da giasts indigens, cun in minus dad 1,1%. Tuttina saja il livel dals indigens vinavant fitg aut, scriva l’Uffizi federal da statistica. Sulettamain ils onns 2021 e 2022 hajan ins observà cifras pli autas.
