Suenter in start bletsch en la stagiun, èsi pir a partir da mez fanadur daventà pli bel. Quai ha procurà per dapli giasts, scrivan las Pendicularas svizras. Dentant il settember ed october èsi lura puspè daventà pli trid e fraid. Guardà sin l'entira Svizra han las pendicularas nudà 7% damain giasts che l'onn 2023. Dentant cumpareglià cun ils ultims 5 onns èsi in plus da 5%.
Grischun cun in minus da 18%
Las pendicularas grischunas han fatg il mender resultat da l'entira Svizra. Il minus da 18% tar ils giasts, cumpareglià cun la stad 2023, è cleramain sut la media svizra cun il minus da 7%. Quai mussan las novas cifras da l'organisaziun Pendicularas Svizras.
Era pers giasts, dentant betg uschè fitg sco il Grischun, han las regiuns Vallais, Part Sura Bernaisa e Svizra Centrala. Ed in pitschen plus da 2% hai sulettamain dà en il Tessin.
Las pendicularas grischunas n'han dentant betg be l'onn passà pers giasts da stad, mabain era en general ils ultims 5 onns:
La stad passada mussa, quant fitg che la branscha da pendicularas è dependenta da l'aura.
Sco il directur da las pendicularas svizras vegn cità vinavant en la communicaziun, vegni en futur adina pli impurtant per las pendicularas da pudair prolungar la stagiun fin l'entschatta november sche l'aura constat, u er prolungar la stagiun d'enviern en la primavaira. Decisiv saja qua ina buna coordinaziun tranter las pendicularas ed il manaschi da gastro.
Differenzas tranter giasts naziunals ed internaziunals
Pendicularas ch'han surtut giasts internaziunals han nudà in pli bass minus da 2% en media. Percunter pendicularas ch'han surtut giasts svizzers han nudà in minus da 11% en media. La situaziun da l'aura na gioghia per giasts internaziunals betg uschè ina gronda rolla sco per giasts svizzers, scriva l'organisaziun Pendicularas Svizras.
