Tranter ils onns 2014 e 2022 han las Pendicularas svizras augmentà fermamain la svieuta durant ils mais da stad – concret per 45%. Uschia fetschia la fatschenta da stad or in quart da la svieuta da traffic, a questa conclusiun è in studi da l'Associaziun da las pendicularas svizras ensemen cun la Scola auta da Lucerna vegnida. Per il studi èn 77 manaschis da pendiculas vegnids intercurrids.
L'enviern anc adina pli impurtant
Tuttina resta l'enviern per bleras pendicularas vinavant la stagiun roiala. Surtut era perquai ch'i dovra 1,3 enfin 4,2 giasts da stad per rimplazzar in giast d'enviern. Per vinavant carmalar avunda giasts l'enviern en ils culms è la segirtad da naiv decisiva. Sch'i dat betg naiv natirala, dovri pussaivladas da far naiv artificiala. Tenor il studi èn perquai investiziuns en infractructura da far naiv da gronda impurtanza per avair success.
Pendicularas èn finanzialmain stabilas
La maioritad da las pendicularas en Svizra saja finanzialmain stabila e sa sviluppada positivamain. Sfidas sajan cunzunt ils custs d'energia ed er la midada dal clima, concludan ils auturs dal studi. Bunamain mintga terza pendiculara intercurrida haja fatg bunas renditas da capital. Finanzialmain bain giaja cunzunt cun ils manaschis gronds en regiuns cun buna segirtad da naiv. 45% da las pendicularas haja ina rendita da capital suffizienta, fertant che bun in quart haja duvrà agid finanzial dad extern per finanziar investiziuns futuras.
