Ils mais avrigl, matg e november èn normalmain ils mais flaivels per ils lieus turistics, ma quest atun vesa quai ora auter. Il sulegl splendura dapi dis e las temperaturas èn agreablas en il Grischun.
Trais regiuns grischunas raquintan ch'i ha fitg blera glieud. Tranter els è Kevin Brunold, il manader da fatschenta da Surselva Turissem. Per el èsi cler ch'il november è tuttina en la stagiun bassa, e ch'i n'ha simplamain betg bleras offertas durant quest temp.
Quai di era Dario Müller, il manader da la partiziun marketing per la regiun da vacanzas en Engiadina, Samignun e Val Müstair.
Sche tut è serrà, na pon ins betg striunar offertas or dal chapè.
Ina regiun che lavura dapi 10 onns la fin d'emna durant il november è la regiun Arosa Lenzerheide. Tenor il manader da marketing Reto Wyss n'hajan els dentant betg cumenzà pli baud cun la stagiun. «I dat mo in dumber limità da dis, durant ils quals las pendicularas na van betg», di el, e durant quests dis stoppian ins sa preparar per la stagiun d'enviern.
Per tuts trais è cler: Ils hotels, las ustarias e las pendicularas dovran ina giada ad onn ina pausa per sa preparar sin la stagiun d'enviern. La fin finala profiteschian ils giasts il pli fitg dals bels dis d'atun en il Grischun.
Or da l'archiv:
