Il Grischun, il pli grond chantun da la Svizra è enconuschent per bellas cuntradas cun numerusas vias da pass che collian culms e vals da la regiun. Quests pass n'èn betg be impurtantas colliaziuns da traffic dentant er rutas popularas per motociclistas, ciclists e viandantas che giaudan la bella cuntrada.
1. Pass da l'Alvra
Il Pass da l'Alvra collia Tusaun en la Valragn cun La Punt en l'Engiadina. Il pass è enconuschent per la cuntrada spectaculara e la lingia da l'Alvra ch'è part dal Patrimoni cultural mundial da l'UNESCO.
- autezza: 2.312 meters
- temp d'avertura: Il pass è per regla avert da mez zercladur enfin mez october, tut tenor cundiziuns da l'aura. L'enviern è la via dal pass serrada pervia da la naiv.
2. Pass dal Bernina
Il Pass Bernina collia l'Engiadina cun il Puschlav e la Valtellina e porscha survista sin ils glatschers sco er ils pizs da la gruppa dal Bernina.
- autezza: 2.328 meters
- temp d'avertura: Il Pass dal Bernina è avert l'entir onn, la via vegn rumida regularmain. Sch'i dat blera naiv e regia cundiziuns d'aura difficilas poi dar ch'il pass è serrà temporarmain.
3. Pass dal Flüela
Il Pass dal Flüela collia Tavau cun l'Engiadina Bassa ed è ina ruta populara per ciclistas e motociclists. Dapi il 13avel tschientaner vegn fatg diever da la ruta sur il Flüela, lura gievan cunzunt ils Gualsers ch'eran sa chasads en il Partenz cun products d'agricultura en l'Engiadina Bassa u schizunt enfin il Tirol. Enavos turnavan els cun sal.
- autezza: 2.383 meters
- temp d'avertura: Il Pass dal Flüela è per regla avert da mez matg enfin la fin d'october. L'enviern è il pass serrà. L'alternativa da vegnir en l'Engiadina Bassa l'enviern è tras il tunnel dal Vereina.
4. Pass dal Güglia
Il Pass dal Güglia è ina colliaziun impurtanta tranter il Grischun Central e l'Engiadina. Tranter il 1935 e 1940 ha la via dal Güglia survegnì sco emprim pass da las Alps ina via asfaltada ed uschia ha questa colliaziun survegnì dapli impurtanza. Oz è il Güglia ina da las vias da pass ch'è frequentada il pli fitg en il Grischun.
- autezza: 2.284 meters
- temp d'avertura: Il Güglia è avert l'entir onn, l'enviern vegn il pass rumì regularmain. I po dar che la via è serrada temporarmain sch'i dat blera naiv u sche las cundiziuns sin via èn difficilas.
5. Pass dal Lucmagn
Il Lucmagn collia la Val Medel cun il chantun Tessin ed è ina ruta da pass pittoresca. Al cumenzament è il Lucmagn stà in pass impurtant en las Alps, quai pervia ch'el n'è betg uschè aut e simpel da cuntanscher. Svelt è quai dentant sa midà – cunquai ch'il Pass dal Gottard ed il Pass dal Spleia èn daventadas pli impurtantas colliaziuns per il traffic nord-sid.
- autezza: 1.914 meters
- temp d'avertura: Il Lucmagn è avert tut l'onn. Quai n'è dentant betg adina stà uschia – dapi il 2011 vegn il pass dentant rumì l'enviern e guardà che la via è averta uschè savens sco pussaivel.
6. Pass dal Malögia
Il Pass dal Malögia e colliaziun tranter la Bregaglia e l'Engiadin'Ota ed è enconuschent per il tschancun plain stortas. Cun charrar questas curvas sa mussa ina bella vista sin la Val Bregaglia ubain il Lai da Segl.
- autezza: 1.815 meters
- temp d'avertura: Il Pass dal Malögia è avert l'entir onn, sch'i dat blera naiv sto el magari vegnì serrà temporarmain.
7. Pass Alpsu
Il Pass Alpsu maina dal chantun Grischun, pli exact da Sedrun en il chantun Uri ad Andermatt/Ursera. Ord la via da sauma d'antruras hai ils onns 1983/1984 dà ina via charrabla per charrotschas. Il 1942 è lura la lingia da viafier (oz Matterhorn Gottard) ida en funcziun.
- autezza: 2.044 meters
- temp d'avertura: Da matg enfin october è l'Alpsu usitadamain avert. L'enviern è il pass serrà.
8. Pass dal Fuorn
Il Pass dal Fuorn collia l'Engiadina cun la Val Müstair ed è part dal Parc Naziunal Svizzer.
- autezza: 2.149 meters
- temp d'avertura: Il pass è avert l'entir onn, sch'i dat blera naiv u cundiziuns difficilas sin via vegn il pass serrà temporarmain.
9. Pass dal San Bernardino
Il San Bernardino è colliaziun tranter Valragn ed il Mesauc. Per lung da la ruta èn da vesair vitgs muntagnards cun charme – anc oz vegn la ruta sur il San Bernardin numnada via taliana.
- autezza: 2.065 meters
- temp d'avertura: Da mez matg enfin il cumenzament da november èsi pussaivel da charrar sur il San Bernardin. L'enviern è la via sur il pass serrada.
10. Pass dal Spleia
Il Pass dal Spleia maina dal Grischun en l'Italia, sin via datti da vesair vitgs istorics e cascadas imposantas.
- autezza: 2.113 meters
- temps d'avertura: Per regla è il pass avert da l'entschatta zercladur enfin la fin d'october. L'enviern è il Spleia serrà.
11. Tunnel dal Vereina
Malgrà ch'i sa tracta betg d'in pass tradiziunal è il tunnel dal Vereina in'impurtanta colliaziun en il Grischun. Cunzunt l'enviern cura che las vias dals pass èn serradas è il Vereina che maina dal Partenz en l'Engiadina Bassa frequentà fitg bain.
- autezza: 1.639 meters (autezza dal tunnel)
- temp d'avertura: Il tunnel è avert l'entir onn ed è l'enviern la ruta alternativa per cuntanscher l'Engiadina. I dat er ina colliaziun da tren.
Ils pass grischuns porschan numerusas pussaivladads da far viadi tras il Grischun e giudair bellas cuntradas. Tut tenor cundiziuns d'aura èsi dentant inditgà da consultar la situaziun actuala da traffic.
Qua vai tar la situaziun actuala da las vias e dal traffic.
