Il Grischun ha sis onns pli ditg ina staziun intensiva d'uffants. L'ospital chantunal ha annunzià en ina communicaziun a las medias ch'el vegn a mantegnair la staziun. L'organ da decisiun da la medischina aut-spezialisada (HSM) ha decidì che l'ospital possia porscher vinavant traumatologia d'uffants e neonatologia.
L'organ da decisiun sa cumpiglia or da las directuras ed ils directurs da sanadad dals chantuns Basilea-Citad, Berna, Genevra, Grischun, Lucerna, Schaffusa, Ticino, Vad, Zug e Turitg. La decisiun davart l'oncologia d'uffants n'è anc betg enconuschenta. L'organ da decisiun ha prendì questa decisiun cuntrari a ses gremi spezialisà ch'aveva recumandà da serrar la partiziun.
Per il schefmedi d'uffants e giuvenils Bjarte Rogdo da l'ospital chantunal saja questa decisiun in ferm signal:
Ina decisiun cuntraria avess tenor l'ospital chantunal muntà ch'ins stoppia serrar la staziun intensiva per uffants. Lura avessan uffants or dal Grischun tut tenor stuì ir a Turitg, Lucerna u Son Gagl per tractaments, ha ditg il schefmedi d'uffants e giuvenils Bjarte Rogdo l'onn passà.
Martin Schmid, president da la fundaziun da l'ospital e cusseglier chantunal dal Grischun, vegn cità en la communicaziun uschia:
L'Ospital chantunal grischun cun sia staziun intensiva d'uffants n'è betg mo relevanta per il sistem per il chantun Grischun e la Svizra Sidorientala, mabain gioga in'impurtanta rolla per l'entira Svizra.
Quai haja sa mussà durant l'unda da virus da RS quai enviern, cura che l'ospital chantunal ha er prendì si uffants d'auters chantuns.
Il Grischun fa part ad ina cunvegna interchantunala. Ina da las finamiras da quella è stada da concentrar purschidas da medischina fitg spezialisada. Cunter la recumandaziun da serrar la partiziun hai dà resistenza, tranter auter ina petiziun per mantegnair la staziun intensiva che passa 30'000 persunas han suttascrit.
