Ils ins èn da Ftan, ils auters dal Tessin – e tuttina han els insatge en cuminanza. Sco geniturs han els stuì passentar dis e perfin mais be quitads per lur figlias sin la staziun intensiva per uffants.
Cun agid da l'octopus
-
Bild 1 von 6Legenda: El ha in octopus en sia isoletta … RTR -
Bild 2 von 6Legenda: ... ella ha er in octopus... RTR
-
Bild 3 von 6Legenda: …ed er el ha in octopus en sia isoletta. RTR
-
Bild 4 von 6Legenda: La staziun intensiva d’uffants a Cuira ha perfin ina stgatla plaina dad octopus. RTR
-
Bild 5 von 6Legenda: Lorena Jeuch, spezialista da tgira, declera pertge: «Tar nus survegnan tut ils uffants naschids memia baud in octopus en lur isoletta. Il segn è ch’ils bratschs dals octopus regordan als uffants a la corda da l’umbli – e ch’els possian sa tegnair londervi sco en il venter da la mamma.» RTR
-
Bild 6 von 6Legenda: Cun agid da l’octopus – in sustegn per cumenzar da sa chattar bain er dador il venter da la mamma. RTR
Nadine era naschida memia baud, Inglina aveva in grev infect. In sustegn per las duas famiglias era, che la staziun intensiva è en il Grischun, a Cuira. Uschia pudevan ellas esser datiers a lur uffants, che sa chattavan en distanza supportabla da lur dachasa.
Process da concentraziun metta en privel la spierta a Cuira
Precis questa spierta, la staziun intensiva per uffants, è en privel dapi passa in onn. Sin incumbensa dals chantuns svizzers vegn numnadamain concentrada dapi il 2009 la medischina autspezialisada en Svizra – e tar quella tutgia, tenor in gremi spezialisà, er la spierta da neonatologia, traumatologia per uffants ed oncologia per uffants da l’Ospital chantunal dal Grischun.
Senza la neonatologia na vai betg
Senza questas disciplinas na rendia sia staziun intensiva per uffants betg, ha ditg sin quai l’ospital. Ed el è ì sin las barricadas, flancà da la politica grischuna e da pli che 30'000 persunas che vulan mantegnair questas spiertas en il Grischun.
En tut il svilup enturn la medischina autspecialisada ha questa opposiziun er contribuì ad ina discussiun, ch'è gia en vigur – la critica vi da la maniera, en la quala che quest process da concentraziun è sa sviluppà durant ils ultims onns. Adina dapli champs da la medischina vegnissan dumbrads tar la medischina autspecialisada ed uschia sa reduciss la purschida en las regiuns pli periferas.
Tge muntass quai per las regiuns?
Intginas regiuns grischunas èn lunsch davent da Cuira, e da l'Ospital chantunal dal Grischun. E sche la staziun intensiva d'uffants stuess serrar – Turitg u auters centers svizzers fissan anc ina giada pli lontans.
Tenor il schefmedi e directur dal Center da sanadad Engiadina Bassa, Joachim Koppenberg, avess la decisiun da serrar la staziun a Cuira consequenzas per l'entir chantun Grischun. Temas sajan il transport, sco era sch'i avess avunda plaz en ils ospitals a Son Gagl, Turitg u Lucerna.