Il 2008 han ils chantuns decis communablamain che be pli medis e medias ch'han blera experientscha tractan cas fitg spezials e rars, sco per exempel transplantaziuns dal cor. Tge cas che valan sco «fitg spezials» decida in gremi interchantunal che definescha ina glista. Quella vegn adattada cuntinuadamain. L'ultima adattaziun ha fatg rubaglias en l'ospital chantunal. Tenor il CEO Hugo Keune stuess l'ospital adattar marcantamain sia purschida tge che pertutga la medischina fitg spezialisada. La pli gronda rusna dess quai tar la medischina per uffants e giuvenils.
- nagina staziun intensiva per novnaschids
- nagins tractaments da trauma e polytrauma tar uffants sut 5 onns (tractaments suenter accidents)
- nagins tractaments da cancer tar uffants
Sche nus stuain stritgar questas purschidas a Cuira, lura ston quests uffants ir fin a Turitg, Lucerna u Son Gagl en l'ospital.
L'idea oriundamain da concentrar medischina fitg spezialisada en singuls lieus vegnia cunquai manada ad absurdum, declera Keune. Adina dapli tractaments vegnian definids – senza raschun medicinala – sco cas «fitg spezials». Dasperas giaja quai savens per tractaments che l'ospital chantunal fetschia di per di.
Provediment regiunal periclità
Pervi da tut las midadas èn ils responsabels da l'ospital chantunal da l'avis ch'il provediment da sanadad regiunal è periclità. I na dastgia betg esser che dunnas ch'han ina gravidanza da ristga ston ir fin a Turitg en l'ospital, hai gì num avant las medias. Per la sanadad dals pazients giuvens saja quai impurtant che la famiglia n'haja betg in lung viadi enfin en l'ospital, ha il schefmedi per medischina d'uffants e giuvenils Bjarte Rogdo accentuà.
La via politica duai schliar il problem
Nus stuain manar questa discussiun sin nivel politic e betg be laschar questa discussiun als represchentants da la medischina.
Per cumbatter questas midadas, ch'il gremi interchantunal propona, va l'ospital chantunal la via politica. Martin Schmid, cusseglier dals chantuns sco er president da la fundaziun da l'ospital chantunal, ha inoltrà ina moziun en la chombra pitschna. Sia finamira è ch'il Cussegl federal vesa ch'il provediment da sanadad saja er da tractar regiunal. I dovria uss ina discussiun politica.
Ils quitads ch'ils responsabels da l'ospital chantunal fan uss, sa basan sin ina recumandaziun d'in gremi dal fatg. La decisiun definitiva suonda lura probablamain en il decurs da l'auter onn e quai dad in gremi che sa cumpona da 10 directurs e directuras da sanadad.
Dapli pazients e dapli gudogn
L'Ospital chantunal a Cuira ha fatg cleramain dapli gudogn l'onn passà. Suenter che la clinica Gut è vegnida integrada cumplettamain resulta per il 2022 in gudogn da 14 milliuns francs, in terz dapli che l'onn avant. Era la svieuta è s'augmentada. Ils 472 milliuns francs muntan in plus da passa 12%, sco l'Ospital chantunal dal Grischun communitgescha.
Er il dumber da pazients e pazientas è creschì. Uschia han l'Ospital chantunal e la Clinica Gut tractà var 131'000 persunas, 22'458 da quellas en maniera staziunara e 110'426 en maniera ambulanta.
Sfidas malgrà bunas cifras
Tenor il president da la Fundaziun Ospital chantunal Grischun Martin Schmid, saja l'ospital confruntà cun grondas sfidas malgrà il bun resultat. Surtut la chareschia e la mancanza da persunal qualifitgà sajan ina sfida. Per meglierar las cundiziuns da lavur, en connex cun la mancanza da persunal qualifitgà ha l'ospital investì l'onn passà 12 milliuns francs.
