L'emprima fin d'emna dal schaner è marschà bler en la clinica d'uffants dal Ospital chantunal dal Grischun; Causa l'unda dal virus RS, ch'è actualmain en la Svizra tudestga, èn sin la staziun intensiva stads enfin 18 uffants. Quai èn dubel uschè blers sco che vessan ensasez plaz. La staziun intensiva ha gì da prender si pazients d'ospitals d'auters chantuns, ch'èn sezs vegnids a lur cunfins.
Tema da stuair serrar la staziun intensiva d'uffants
Che la staziun intensiva d'uffants è pli che plaina - n'è ensasez nagut fitg extraordinari sch'i dat talas undas. I para dentant curius en il context actual. L'Ospital chantunal grischun tema numnadamain, ch'el sto en futur serrar sia staziun intensiva d'uffants. Quai causa ina proposta dal gremi d'experts da la «Conferenza da directurs e directuras cantunals da la sanadad GDK». La GDK definescha tge tractaments che valan sco «medischina autspezialisada» e reparta e centralisescha las incumbensas sin ils ospitals. Quai tenor differents criteris - sco per exempel il dumber da cas.
E tenor il gremi d'experts n'haja quai en la staziun intensiva d'uffants memia paucs cas da «medischina autspezialisada» per vinavant porscher quels tractaments. Quai munta che la clinica d'uffants avess en futur da desister da sia neonatologia, oncologia e traumatologia. Il tractament cun agid da respiraziun d'uffants novnaschids cun il virus RS na fiss en consequenza betg pli pussaivel sin la staziun intensiva a Cuira.
L'Ospital chantunal crititgescha la proposta da la GDK ord plirs motivs. Per l'ina haja la staziun intensiva d'uffants tenor els avunda cas. La GDK quintia cun medias e na resguardia betg las undas ch'i dettia (sco per exempel l'unda actuala dal virus RS) che pretendan in tschert «plaz sin reserva». Ultra da quai saja il catalog, che definescha tge tractaments che valan sco «medischina autspezialisada» creschì memia fitg ils davos onns. L'onn 2008 èn quai anc stads 8 tractaments – l'onn 2020 èn quai stads 43. Tenor l'Ospital chantunal valian oz memia blers tractaments sco «medischina autspezialisada».
E sche la staziun intensiva d'uffants a Cuira na dastgass betg pli porscher ils tractaments che valan tenor ils criteris actuals sco «medischina autspezialisada» – di il schefmedi da la clinica d'uffants Bjarte Rogdo, ch'ella avess memia paucs cas (interessants) per restar in lieu da lavur attractiv. En consequenza mancass il persunal – e la staziun avess da serrar sias portas.
Surdà petitziun per salvar la staziun
Ord tema da quest scenari – aveva l'Ospital chantunal lantschà ina petiziun. Quella è uss vegnida surdada cun passa 30'000 suttascripziuns. Ina uschè gronda reacziun haja la GDK anc mai survegnì sin ina proposta da ses gremi d'experts, di la secretaria generala da la GDK Kathrin Huber. Ella di che la decisiun finala na saja dentant betg anc fatga – e che tut ils arguments vegnian examinads cun premura. Ina decisiun definitiva da la GDK è da spetgar la primavaira 2024.