Organisaziuns che sustegnan persunas cun impediment stattan tar l’inclusiun en il mund da lavur en contact direct cun ils pertutgads e las pertutgadas. En il Grischun datti 12 da questas organisaziuns, tranter auter l'Argo, Plankis e Movimento che gidan a persunas cun impediments da s’integrar. Per che las organisaziuns pon porscher tut survegnan ellas agid da l’Uffizi chantunal dal servetsch social. Per la gronda part è quai in agid finanzial e organisatoric.
Nossa lavur per l’inclusiun è per gronda part che nus avain avunda finanzas e che nus avain bunas strategias.
Il dumber da persunas che lavuran en il segund martgà da lavur è s'augmentà cuntinuadamain en ils ultims onns. Tar il segund martgà da lavur tutgan plazzas protegidas. L'onn 2015 eran quai anc 828 persunas, il 2019 893 persunas e l’onn passà han 906 persunas lavurà en il segund martgà da lavur.
En l'emprim martgà da lavur – quel che vegn er numnà martgà regular – è il dumber da persunas cun impediments creschì. Patruns da lavur che engaschan persunas cun impediment pon survegnir sustegn finanzial u cussegliaziuns dal chantun. L’onn 2001 han 12 persunas lavurà en il martgà da lavur regular, en quest temp hai dà 5 fatschentas ch'han purschì plazzas per persunas cun impediment. L’onn 2010 eran quai 39 persunas ed igl ha dà 28 fatschentas.
Suenter hai dà in svilup constant ed il 2022 han lavurà 62 persunas tar fatschentas en l’economia libra. L’onn passà han 55 fatschentas en il Grischun purschì plazzas. La pli gronda purschida datti en la branscha d’agricultura ed en ospitals. La purschida pli pitschna èn la branscha da communicaziun ed en l’industria da laina.
