La Notg dals films curts vegn organisada dal festival «Kurzfilmtage Winterthur». Mintg'onn datti sper ils dis dal festival er ina turnea tras l'entira Svizra, nua ch'in program da films curts vegn preschentà. Uschia porta il festival la furma dal film curt en tut las regiuns svizras.
Sco emprim datti adina ina premiera locala. A Cuira è quai stà il film curt animà «BOX» d'Aline Schoch ch'abita en la Val Lumnezia. Il film tracta da figuras che vivan en in sistem che dat dapart – e mussa tge ch'è tut pussibel sch'ins tegna ensemen. Per Aline Schoch esì bel da vesair ses film sin ina taila gronda, quai na saja betg uschè savens il cas tar films curts, di la reschissura.
Distribuir films curts è pli grev che films lungs, era perquai che quels na vegnan strusch mussads en ils kinos.
Suenter la premiera èn vegnids mussads trais blocs da films. Il program è lung ed intensiv, las pausas tranter ils blocs èn curtas. Uschia èsi er ina sfida da curatar in program da films curts, perquai ch'i sto restar interessant per il publicum. L'entira saira èn vegnids mussads en tut 16 films ed il program ha durà passa quatter uras, enfin suenter mesanotg.
Igl era bler, ma tar films curts funcziuna quai. Jau prend cun mai stgaglias dals differents films che ma restan.
Il publicum da la Notg dals films curts ha reagì fitg positiv sin ils films fitg differents. Diversas persunas han ditg ch’ellas sajan stadas impressiunadas da la varietad dals temas e da la maniera concisa ch’ils films raquintan bleras istorgias en fitg curt temp. Per blers e bleras èsi stà in'experientscha nova da vesair films curts sin la taila gronda – enstagl da be online, sin il telefonin u sin il computer. La Notg dals films curts ha pia mussà che films curts n’èn betg be ina furma curta dal film lung, mabain in'atgna furma dal film cun in agen ritmus che funcziuna tut auter.