La Greina è la planira alpina tranter il Grischun ed il Tessin. Planisà era da realisar sin quella planira in mir da serra. Suenter gronda resistenza cunter il project è la decisiun vegnida prendida da betg realisar il project. Bleras persunas èn s’engaschadas cunter quest project, in dad els l’artist Bryan Thurston. El ha dissegnà bleras giadas la planira ed ins chatta passa 5’000 da sias ovras en l’archiv da la biblioteca naziunala. Ed el ha cun sia passiun per la tematica era agì a moda extrema, quai ch’ha engrevgià la relaziun cun ses figl. E quai mussa il film, ina relaziun tranter bab e figl, ma era in cumbat per la natira cun poesia, sco Bryan Thurston ha ditg en il film.
In cumbat purtà en las valladas rumantschas
En il film è era da vesair co las vischnancas da Vrin e Sumvitg han agì e che la chapientscha da proteger quella cuntrada n’era betg propi derasada. Ma la finala di Gion Caminada èn quels ch’eran avant 40 onns per il project uss era dal avis ch’inundar la planira fiss stà in sbagl. Gion Caminada enconuscha bain l’artists Bryan Thurston. Els telefoneschan pliras giadas l’emna. E Caminada raquinta che las emprimas giadas che l’artist cun ragisch en Soczia è arrivà hajan ins surtut ris e betg prendì serius quai um. Ma el saja adina stà abels da inscenar e perquai na pudevan ins tuttina betg ignorar l’artist. Durant las bleras visitas a Vrin ha Bryan Thurston adina malegià in maletg sin la paraid da cuschina dals Caminadas e quels existan anc oz, ha la dunna da Gion Caminada, Giuseppina Caminada raquintà. Ma che Bryan Thurston haja liberà la Graina na possian ins betg dir, ma el saja stà ina impurtanta part da quest cumbat, ha Gion Caminada ditg a la fin dal film.
Empruvà da vegnir pli datiers in a l’auter
La relaziun tranter Patrick Thurston e ses bab è ina relaziun difficila. Uschia raquintà il reschissur ch’el haja stuì cumbatter cun sasez da realisar quai film ma la finala saja il film in regal a ses bab ed ina emprova da realisar daco che Bryan Thurston è s’engaschà talamain per in project, per ina cuntrada. La finala è surtut quest engaschi il motor per l’artist, in motor ch’è anc oz da sentir tar l’artist da 91 onns.