Il 2025 pudess daventar ina festa per fans da kino. Hollywood ha puspè preparà detgas perlas per la taila gronda. Ins po sa legrar sin cuntinuaziuns epicas, blockbusters spectaculars ed istorgias tut novas. Action, romantica u science-fiction – il 2025 stremblan las salas da kino. Qua ina emprima egliada sin intgins dals highlights. Avais preparà il popcorn?
Robbie Williams sco schimgia ... Uschia cumpara il star da pop brit en il film biografic «Better Man» che lantscha l'onn da kino 2025. Il film raquinta da la carriera fulminanta dal chantadur, ma era da las varts stgiras cun drogas e demunis interns.
E restain gist tar ils demunis. Era fans da films da sgarschur vegnan sin lur custs il 2025. Per exempel grazia a «Nosferatu» per mo numnar in da quels films d'orrur. Dapli che 100 onns suenter la premiera dal film mit, datti quest onn in segund remake dal film dal vampir renumà.
In auter remake grond da quest onn vegn ad esser quel dad «Alvetta». Il classicher da Disney dal 1937 cumpara il mars cun acturas ed acturs reals. Tranter auter cun Gal Gadot ch'ins enconuscha forsa sco «Wonder Woman». Tar «Alvetta» gioga ella la regina nauscha.
Ed er intginas cuntinuaziuns da films pudessan laschar batter il cor da fans da kino in pauet pli spert. Ina che na vegn per ina giada betg da Hollywood è «Das Kanu des Manitu». La segunda part da la cumedia tudestga da Michael «Bully» Herbig.
Ma era la buntadaivla caota «Bridget Jones», ils dinosaurs da «Jurassic World», «Mission Impossible» cun Tom Cruise ed ils Na'vi blaus dad «Avatar» turnan quest onn cun ina ulteriura cuntinuaziun sin la taila gronda – intgins cun chavels pli grischs che tschels. Ed era dal film-musical «Wicked» che gira gist uss anc en ils kinos vegni a dar vers la fin da l'onn ina segunda part.
E quai èn mo stads intgins dals highlights da kino che spetgan quest onn. Uschia ch'er il 2025 pudess daventar in onn plain muments da kino nunemblidaivels.
