La citad da Cuira ha in nov «masterplan» areguard energia e clima. Quel duai mussar co che la citad vul far frunt a las sfidas da la midada dal clima e dal provediment d'energia. Il cussegl da la citad ha la finamira da cuntanscher la finamira da reducir las emissiuns da gas da serra sin netto nulla fin l'onn 2050 per Cuira e sche pussaivel fin l'onn 2040 per l'administraziun da la citad, communitgescha la citad da Cuira.
Sper las finamiras vegnian en il masterplan era definidas mesiras en ils secturs dal provediment d'energia, mobilitad, allontanament, construcziun e planisaziun. Uschia ha la citad da Cuira per l'emprima giada in'atgna strategia davart energia e clima.
Custs da 120 fin 150 milliuns francs
La citad quinta cun 120 fin 150 milliuns francs per metter en pratica las mesiras. Quests custs cumpiglian era ils 80 milliuns francs per bajegiar ora il provediment da chalur e fradur da l'IBC ch'eran gia vegnids approvads da la populaziun. Co priorisar las mesiras dependia da la situaziun finanziala da la citad e stoppia vegnir coordinà cun la planisaziun da las investiziuns sur plirs onns.
Cuira cuntinuescha «Green Deal» dal chantun
Cun vulair reducir las emissiuns cun gas da serra sin netto nulla fin il 2050, suonda la citad da Cuira a la Confederaziun e chantun e cuntinuescha il plan d'acziun «Green-Deal» dal chantun. Plinavant vul la citad fungar sco exempel e reducir las emissiuns da l'administraziun da la citad sin netto nulla gia fin il 2040.
Las interpresas datiers da la citad, IBC ed il bus da Cuira, han era definì lur finamiras sin basa d'atgnas strategias. Era lezs vulan cuntanscher netto nulla fin il 2040.
Differents projects sajan gia en planisaziun
Sco la citad scriva vegnan en questa legislatura preschentà al cussegl da la citad differents projects en connex cun questa strategia. Sper il project da l'IBC, dettia per exempel projects sco l'actualisaziun dal plan directiv da l'energia, la revisiun parziala da l'urden fundamental concernent l'implant d'energia da vent Oldis Il, la reintroducziun dal project da l'ovra electrica «Pradapunt», sistems da tracziun regenerabels per il bus da Cuira u il masterplan ARA 2035.
