En las valladas dal sid grischunas ed en il Tessin avertescha l’Uffizi federal per meteorologia e climatologia dad in privel considerabel pervi da la plievgia.
I saja pussaivel ch’il livel da l’aua dad auals creschia e ch’i dettia inundaziuns localas e sbuvaditschs. En il chantun Grischun pertutgan las malauras Bregaglia, Moesano e Puschlav, sco che l'Uffizi federal per meteorologia e climatologia (Meteoschweiz) ha communitgà mardi. Pertutgadas en il Tessin èn las regiuns Blenio, Riviera, Bellinzona e Sotto Ceneri.
Star davent da l'aua
I vegnia recumandà d'evitar territoris da riva da flums e lais sco er spundas taissas. Era ils curs lung ad auals en la muntogna sajan d’evitar strictamain pervi da bovas pussaivlas, ha scrit MeteoSvizra.
Cun las pli grondas quantitads d’aua vegni quintà questa saira e la notg sin mesemna. Suenter ina pausa damaun crescha la gievgia puspè la quantitad da l’aua en flums ed auals.
Pir la stad passada han malauras chaschunà grevs donns en la Val Maggia dal Tessin e chaschunà pliras persunas mortas.
Prova per Lostallo
Suenter las malauras dal zercladur sentian ins tenor il president communal Nicola Giudicetti a Lostallo en cas da blera plievgia anc ina tscherta malsegirtad en la populaziun. La plievgia actuala n'haja betg chaschunà donns, ma plievgia intensiva saja en la regiun ussa sco in test per las reconstrucziuns che hajan tegnì fitg bain enfin ussa.
I dovria anc temp e pazienza enfin che tut las lavurs da reconstrucziun èn terminadas, uschia che er ils ultims fastitgs che la malauraha laschà enavos spareschian, e ch'il vitg possia puspè vegnir uschia sco ch'el era avant las malauras.
Or da l'archiv:
