La stad bletscha n’ha betg mo dischavantatgs. Per l'agricultura munta quai grondas racoltas da fain, dentant era fasas strentgas da dumagnar il pavel sut tetg. Ils purs da la Mesolcina ston sper la racolta er anc schubregiar la cultira dal material che las bovas han purtà a val la fin zercladur. Enturn 100 hectaras en la val èn cuvertas cun buglia, crappa e laina. Sin questas surfatschas na datti nagina racolta quest onn. I dat pia ina mancanza da pavel per ils purs en la Mesolcina schebain ch'i fiss in grondius onn da racolta.
Acziun da solidaritad
L'Uniun Purila Grischuna ha inizià mez fanadur in'acziun da donaziun per ils purs pertutgads en la Mesolcina. Duas emnas suenter l'appel èn gia passa 100 manaschis s’annunziads per gidar cun pavel.
Nus essan fitg cuntents cun il resun. Intgins purs han telefonà a nus gia avant il cumenzament da l’acziun.
Las proximas emnas prenda l’uniun purila encunter las donaziuns, entant ch’il Plantahof è vi da stimar ils donns da las bovas al lieu. Il mument na san ils responsabel dal Plantahof anc betg numerar quant pavel che manca. Cura che quai è enconuschent vegn coordinà il basegn e la purschida dal pavel per che quel possia vegnir transportà en ils lieus correspundents.
La finamira è da furnir il pavel la fin d’avust per che quel è en la Mesolcina cura ch’ils animals turnan da las alps.
