Mesolcina - 190 voluntaris han gidà da rumir prada e cultira

Radund in mais suenter las malauras desastrusas en la Mesolcina hajan passa 190 voluntaris nettegià prada e cultira sin 13 plazzals – quai cun agid da maschinas grondas d’interpresas da la regiun. Ils voluntaris e voluntarias èn vegnids or dal Tessin, l'Italia e la Svizra tudestga.

Il dumber dals voluntaris haja surpassà las spetgas dals organisaturs, ha communitgà la regiun Moesa. La vischnanca da Lostallo haja engrazià cun in gentar cuminaivel.  Las malauras dals 21 da zercladur  han chaschunà auas grondas e bovas. Duas persunas èn mortas, ina ulteriura è anc sparida. La vischnanca da Lostallo stima il donn material a 38 milliuns francs. Glindesdi saira infurmescha ella davart il stan actual ed ils proxims pass planisads.

Di da solidaritad, ils 20 da fanadur 2024

Marcus Caduff e Peter Peyer èn stads l'entschatta fanadur al lieu

Ils cussegliers guvernativs Marcus Caduff e Peter Peyer han sa laschà infurmar entschatta fanadur da las autoritads da la regiun Moesa e da las vischnancas. Discutà han ins ils progress da las lavurs, sco e las sfidas che spetgan la vallada.

Il chantun ha gia cumenzà d’analisar las malauras, e da ponderar tge novas mesiras da protecziun ch’i duvrass. Vitiers sustegna l’Uffizi da guaud e privels da la natira la regiun en connex cun organisar las lavurs da rumida. Il provediment cun aua da baiver funcziuna puspè.

Per pudair deponer tut il material da la bova a Sorte servan il mument schliaziuns provisoricas. Uss hai num chattar in plaz definitiv – ils plans per in tal èn en elavuraziun tenor las infurmaziuns dal chantun.

Sfida per l’economia e l’agricultura

Las malauras han era procurà per problems tar las interpresas da la Mesolcina. Qua po il chantun gidar cun indemnisar lavur reducida. Fin il 1. da fanadur ha l’Uffizi per industria, mastergn e lavur registrà 18 preannunzias per lavur reducida. Sis da quellas èn gia approvadas.

Ils purs cun terren tutgà da las malauras survegnan tuttina ils pajaments directs per quel, per l’onn 2024. E per ils donns stat a disposiziun la Cassa per donns elementars.