Ils cussegliers guvernativs Marcus Caduff e Peter Peyer han sa laschà infurmar il glindesdi saira da las autoritads da la regiun Moesa e da las vischnancas. Discutà han ins ils progress da las lavurs, sco e las sfidas che spetgan la vallada.
Donns dad 8 fin 15 milliuns francs
Ils donns che l’Assicuranza d’edifizis dal Grischun ha constatà fin uss vi da bajetgs en la Mesolcina ed en la Val Calanca, muntan ad 8 fin 15 milliuns francs. Fin uss hai dà pli che 220 annunzias da donns vi da bajetgs. La dimensiun dals donns vi da parcellas e cultiras vegn actualmain anc eruida. Per ils donns vi da vias ed infrastructura na datti anc naginas cifras.
Il chantun ha gia cumenzà d’analisar las malauras, e da ponderar tge novas mesiras da protecziun ch’i duvrass. Vitiers sustegna l’Uffizi da guaud e privels da la natira la regiun en connex cun organisar las lavurs da rumida. Il provediment cun aua da baiver funcziuna puspè.
Per pudair deponer tut il material da la bova a Sorte servan il mument schliaziuns provisoricas. Uss hai num chattar in plaz definitiv – ils plans per in tal èn en elavuraziun tenor las infurmaziuns dal chantun.
Sfida per l’economia e l’agricultura
Las malauras han era procurà per problems tar las interpresas da la Mesolcina. Qua po il chantun gidar cun indemnisar lavur reducida. Fin il 1. da fanadur ha l’Uffizi per industria, mastergn e lavur registrà 18 preannunzias per lavur reducida. Sis da quellas èn gia approvadas.
Ils purs cun terren tutgà da las malauras survegnan tuttina ils pajaments directs per quel, per l’onn 2024. E per ils donns stat a disposiziun la Cassa per donns elementars.
