Cun l'autostrada A13 serrada pervia da malauras croda davent ina ruta impurtanta per il traffic da nord-sid. Cun quai era atgnamain da spetgar ch'i dat sur la fin d'emna – cun emprim traffic da vacanzas – blers autos sin las vias en Surselva. Quai na para dentant plitost betg dad esser il cas, sco ch'ina visita enturn Mustér mussa. Qua u là datti in pèr autos dapli, ins sto spetgar. Dentant grondas colonnas n'hai betg dà.
Lucmagn serrà in pèr uras
Suenter ch'ina bova è vegnida giu, era il Pass dal Lucmagn serrà l'avantmezdi. Dapi circa las 10:45 è la via puspè averta. Quai ha la Polizia chantunala confermà sin dumonda dad RTR.
Anc l'avantmezdi ha la polizia quintà che la via resta serrada pli ditg. Relativamain bler material e grips sajan vegnids sin via. Sco che Roman Rüegg, il pledader da medias da la Kapo, ha ditg, sajan las lavurs dentant avanzadas bain e spert. Auter che pitschens donns vid il catram saja la via intacta.
Situaziun da traffic
Sco ch'i sa sviluppa vinavant ils proxims dis – gist er cun las malauras en la Val Maggia – è grev da dir. Cun quai ch'il Pass dal Lucmagn è puspè avert, datti dentant ina ruta alternativa.