La ruta dal San Bernardino sur l'autostrada A13 è puspè averta per il traffic da transit, quai dapi questa bun'ura a las 5:00. Duas emnas suenter las malauras desastrusas en la Mesolcina vegn l'autostrada puspè averta sin mintgamai in vial.
Actualmain na recumonda l’Uffizi federal da vias la ruta dentant anc betg sco alternativa per l’A2 al Gottard. Igl emprim stoppia il manaschi funcziunar tenor giavisch. La sanaziun totala da la via vegnia a cuzzar fin l’atun. Tenor l’Astra muntan las lavurs da rumida e da reconstrucziun a tschintg fin set milliuns francs.
Bunas cundiziuns
Grazia a l'aura stabila ha il traject pudì vegnir reparà pli spert che quintà. La sanaziun totala da la via, ch'è il mument be anc averta sin in vial, vegn tenor l'uffizi federal da vias però a cuzzar fin l'atun. En il Tessin avertescha il stab da crisa fertant però danovamain da malauras la fin d'emna. En la part sura da la Valle Maggia sajan ins perquai vi dad elavurar in plan d'evacuaziun, uschia las autoritads tessinaisas.
Sco il chantun communitgescha vegn er averta la via sur il Pass dal San Bernardino, quai però be fin Lostallo. Il traject tranter Lostallo e Grono resta vinavant serrà per il traffic da transit. Quai per che las lavurs da rumida e reparaziun na vegnian betg impedidas. Surtut a Sorte vegnian quellas anc a durar pliras emnas. Il traffic turistic cun cumprova da reservaziun po però passar.
A Lostallo è Moreno Monticelli – il manager da crisa ed l'anteriur schuldà da professiun – al lieu per coordinar las lavurs da rumida.
Moesa puspè en ses letg
Il venderdi ha l'uffizi federal communitgà, ch'il flum Moesa saja puspè manà enavos en ses letg oriund. Uschia hajan las lavurs per reconstruir il trassé da la via pudì cumenzar. Sche tut funcziuna sco previs, pon las lavurs da cuvrida gia succeder l'entschatta da l'emna proxima.
Sche las lavura cuntinueschan bain e l'aura e favuraivla, duess l'autostrada puspè esser averta en il decurs dals 5 da fanadur. Quai sin in vial per direcziun. Per refar dal tut l’autostrada tranter Lostallo e Mesocco quinta l'Uffizi federal da vias ch'i dovra probablamain tut il temp fin la fin da l’onn. In stgarp da radund 120 meters en il terren en la vischinanza da Mesauc pudess dentant avair per consequenza ch'il terren sa distatgass. Lura stuessan las lavurs da construcziun vi da l'A13 vegnir interruttas tenor l'Astra.
Il traffic da transit vegn zavrà en il nord a Tusaun Sid ed en il Valragn, ed en il sid a Lostallo. Viadis en ed or da la Val Schons ed il Valragn sajan pussaivels, communitgescha la polizia chantunala. La via chantunala en la Mesolcina serva exclusivamain al traffic local, per che la via stettia a disposiziun al traffic da construcziun ed a la populaziun locala.
Vacanzas da stad portan dapli traffic
L’emprima fin d’emna cun in ferm augment dal traffic pervi da las vacanzas da stad è ils 6 da fanadur. Cunzunt sin l’autostrada A2 tras il chantun Uri saja da spetgar cun dapli colonnas ch’uschiglio schont, scriva l’Astra en sia communicaziun.
Ina mesira supplementara è che las Viafiers federalas augmentan la capacitad tras il tunnel dal Gottard. La SBB vegn a porscher las fins d’emna 11’000 plazs supplementars. E per transportar camiuns sin vaguns da tren metta l’interpresa Hupac a disposiziun capacitads supplementaras.
Per il traffic pesant al Gottard sclerescha l’Uffizi federal da vias anc autras schliaziuns. Uschia pudess il scumond da charrar la notg vegnir abolì, per tscherts temps e tschertas regiuns. Vitiers vai per pudair priorisar il traffic da camiuns entaifer la Svizra al Gottard.
