Il 1. da schaner 2025 vegn la SRG SSR, e cunquai era RTR, a chalar da nizzegiar la tecnologia dad undas ultracurtas, era enconuschenta sco UKW. La derasaziun da las emissiuns cuntinuescha sin DAB+ e sur l'internet.
I na dettia strusch pli radios che nizzegian UKW, scriva la SRG SSR en ina communicaziun. Gnanca 10 pertschient dal diever saja anc UKW. Cun desister sin la derasaziun via undas ultracurtas possia ins spargnar plirs milliuns francs, e DAB+ e l'internet sajan pli effizients areguard l'energia ed hajan ina meglra qualitad da tun.
Per pudair retschaiver DAB+ dovr'ins in apparat u in adapter correspundent. A partir da l’atun 2024 vegnian las audituras ed ils auditurs pertutgads preparads sin la finiziun da las undas ultracurtas, tras mesiras da communicaziun concretas.
