- SRF stritga ils proxims mais radund 75 plazzas a temp cumplain.
- A partir da la stad 2025 vegnan las ediziuns da la «Tagesschau» da mezdi ed a las 18:00 remplazzadas tras newsflashes moderadas. La fin d'emna scroda l'ediziun da mezdi.
- Las emissiuns «Club» e «Gesichter & Geschichten» fan pausa la stad.
- Ultra da quai vegn la direcziun pli pitschna e prendidas ulteriuras mesiras.
Per evitar in deficit finanzial a partir dal 2025 dovria anc dapli reducziuns da plazzas, communitgescha l'interpresa. Da las 75 plazzas a temp cumplain vegnan reducidas 10% tar il cader.
Sin basa dal project strategic d'interpresa «SRF 4.0» dovira ultra da quai ulteriuras midadas punctualas en la purschida d'infurmaziun fin il 2027. La realisaziun dal pachet da mesiras tar «SRF 4.0» succeda per gronda part a partir da mez october.
Schefredacziuns Video ed Audio/Digital fusiuneschan
En pli ha la direcziun da SRF prendì ina decisiun da mussavia: Da las duas redacziuns da video ed audio/digital ch'èn oz separadas resulta a media vista en ils lieus Berna e Turitg ed en las regiuns ina schefredacziun communabla e multimediala.
En quest connex ha la directura da SRF, Nathalie Wappler, punctuà a l'occurrenza da persunal dad oz: «La separaziun da las redacziuns n'è betg pli confurma al temp ed impedescha adina pli fitg las fatschentas quotidianas. En l'èra digitala ston las istorgias vegnir pensadas consequentamain a moda multimediala, quai ch'è pussaivel en duas organisaziuns separadas mo cun custs supplementars.»
La concepziun detagliada da la schefredacziun communabla vegn elavurada a partir da l'onn 2025, la partenza da la nova organisaziun è planisada per l'onn 2026. Sper la fusiun da las duas schefredacturas desista la directura Nathalie Wappler era da reoccupar la direcziun culturala en sia furma actuala. Quella è vacanta suenter che Susanne Wille è vegnida elegida sco directura generala da la SSR.
Mesiras da spargn supplementaras tar la SRG e tar SRF
Pervia da la decisiun dal Cussegl federal survegn la SSR a partir dal 2025 be pli la mesadad da la cumpensaziun da chareschia sin la taxa da medias. Perquai dovri per l'entira SSR mesiras da spargn en la dimensiun da 50 milliuns francs – da quai ulteriurs 6,3 milliuns francs tar SRF.
Mesiras supplementaras èn necessarias pervi da la reducziun da las entradas commerzialas. Tut quels respargns po SRF far l'onn proxim cun reducziuns unicas tar la purschida, tar projects e cun prestaziuns da support. La reducziun da singulas plazzas duai succeder tant sco pussaivel sur la fluctuaziun natirala.
