En differentas medias vegn rapportà dals livels bass da l’aua en lais e flums en tut la Svizra. La mancanza da plievgia e las temperaturas autas chaschunan rivas sitgas e bartgas parcadas en sablun.
Ma guarda quai tar nus en Grischun er ora uschia? Per respunder questa dumonda san ins per ina dar in sguard sin ina carta da l’Uffizi federal d’ambient (BAFU). Questa carta mussa las mesiraziuns en ils differents lais e flums en tut la Svizra. Uschia pon ins guardar sch'il livel d’aua è normal, bass u fitg aut en congual cun las mesiraziuns dals ultims onns.
La carta mussa ina situaziun detg normala ed er l’Uffizi per la natira e l’ambient dal Grischun conferma quai. Els han ditg envers il RTR ch'i na dettia per il mument nagin motiv per far quitads. Ma i saja d'observar vinavant co che la situaziun sa sviluppa. Cunzunt l’aura gioga ina gronda rolla.
Sche la plievgia na vegn betg il proxim temp, lura vegnin nus era ad avair livels d'aua bass.
Era l’Uffizi da chatscha e pestga conferma ch'ls livels d’aua en il Grischun na chaschunan betg problems u mesiras extraordinarias per la protecziun dals animals.
Ils livels d’aua en Grischun èn damai in zic pli bass che uschiglio durant l'onn, ma per quests mais tuttina anc normals. E sche la prognosa da l’aura tegna quai ch'ella empermetta datti gia bainbaud plievgia.
Cunquai che quest enviern hai dà plitost pauca naiv han ins da far quint cun pauca aua da naiv. Quai sa er rinforzar la mancanza d’aua er sche la plievgia vegn anc.
Ina interpresa che bada quai gia uss è la Repower. Els produceschan ina gronda part da lur forza cun ovras idraulicas. Sco ch'il CEO Roland Leuenberger declera vegn quella forza vendida gia oravant, ma sche l’aua manca lura manca er la forza. Lura ston els cumprar sin il martgà internaziunal la forza che manca.
Uniun purila dal Grischun spera tuttina sin plievgia
Er l'agricultura en Grischun bada la mancanza d’aua. Sco il president da la suprastanza da l’unin purila Thomas Roffler di na saja la situaziun betg extraordinaria, ma tuttina betg ideala. Cunzunt en ils lieus pli bass sco in la Val dal Rain vesan ins che l’erva na crescha betg uschè bain perquai che l’aua manca. En ils lieus pli auts na saja anc betg visibel perquai ch'igl è là anc memia fraid.
Il president da l'uniun purila manegia che la situaziun na saja il mument anc betg acuta, ins speria dentant sin la plievgia per che l’erva po crescher. Ma ins saja anc al principi da l’onn e bler possia anc sa midar e meglierar, manegia el, uschia ch'el na fetschia anc betg memia blers quitads.