L'interpresa d'energia grischuna Repower ha fatg l'onn da gestiun 2024 cleramain damain gudogn che l'onn avant. La contribuziun al gudogn da la fatschenta commerziala internaziunala è bain stada puspè auta, ma ella n'ha betg pli cuntanschì il nivel extraordinari da l'onn 2023.
Il resultat da gestiun avant tschains e taglia sin rendita (EBIT) è sa reducì per 45% sin 175 milliuns francs ed il gudogn net per 54% sin 138 milliuns, ha communitgà la Repower la mesemna. Omaduas valurs eran dentant anc adina pli ch’il dubel da l’onn 2022.
La contribuziun da resultat la pli gronda resulta danovamain or da la fatschenta commerziala internaziunala. Ils pretschs d'energia a las bursas internaziunalas èn tut en tut ids enavos. En quest ambient fitg pretensius saja vegnì cuntanschì «in fitg bun resultat».
Survista da las cifras
En milliuns francs
| 2024 | 2023 | 2022 | Midada 2023/2024 | |
|---|---|---|---|---|
| Gudogn da la gruppa | 138 | 300 | 53 | -54% |
| Resultat da gestiun (EBIT) | 175 | 371 | 82 | -45% |
| Agen chapital | 1'181 | 1'141 | 874 | +4% |
| Quota d'agen chapital (%) | 53 | 43 | 20 | +23% |
| Investiziuns | 79 | 102 | 30 | -23% |
Reavertura da l'implant Robbia
La producziun d'electricitad è cun 2'639 uras gigawatt stada per 14% pli auta che l'onn precedent. Ils motivs èn tranter auter la reavertura da l'ovra electrica a Robbia sco er las bunas cundiziuns idrologicas. Grazia a l'avertura dal Parc solar a Melfi la stad 2024 è ultra da quai s' augmentada la producziun d'electricitad en l'Italia per 10%.
Cuntrari a quai è la producziun en ils parcs da vent sa reducida per 6% pervia da las relaziuns da vent disfavuraivlas. Er en l'ovra electrica da gas a Teverola è la producziun sa reducida per 18%, perquai che la dumonda per energia regulara è stada fitg pitschna en la regiun dal Centro Sud.
Modernisaziun da la rait
Pervia da la situaziun adina pli pretensiusa tras la rait da distribuziun d'implants solars, da pumpas da chalur e da staziuns per chargiar vehichels electrics ha la Repower investì totalmain 28 milliuns francs en la modernisaziun da l'infrastructura da la rait.
Grazia al svilup da fatschenta positiv haja la Repower ina basa finanziala robusta, è vinavant da leger en la communicaziun. Ils proxims onns investeschia l'interpresa sistematicamain en l'engrondiment d'implants per la producziun d'energia regenerabla sco era en la modernisaziun da l'infrastructura da la rait.