Numerus flums e lais en Svizra han gia uss nivels d'aua bass fin fitg bass e la situaziun pudess vegnir mendra. Il favrer ed il mars han ins registrà en pliras regiuns mo la mesadad da las precipitaziuns usitadas - en il Vallais eran quai mo 25%.
En media possian las auas sutterranas bain mantegnair lur nivel, mo ins stoppia survegliar la situaziun, accentuescha Christine Genolet-Leubin, la scheffa dal servetsch per l'ambient dal chantun Vallais. Dapi dus mais na vegnan las auas sutterranas quasi betg pli alimentadas da las plievgias. Mo grazia a la naiv vegnan ils nivels mantegnids. «Nus essan tar -60% u -80 % da plievgia. Nus avain era temperaturas che èn per radund 2 grads pli autas che la media dals ultims 30 onns. Nus avain in sulegl che splendura relativamain ferm e lura avain nus ina cuverta da naiv che è relativamain flaivla», ha declerà Christine Genolet-Leubin lil mardis en La Matinale da la RTS.
La plievgia vegn mez avrigl – speranza
Bain possian las auas sutteranas en media mantegnair lur nivel, mo tuttina sa sbassa lez «plaun a plaun perquai che nus n'avain nagina alimentaziun, particularmain tras las precipitaziuns», agiunta la scheffa dal Servetsch per l'ambient dal Vallais. I va pia gia vid il chapital d'aua per ils proxims mais.
En tscherts lieus manca l'aua e tscherts secturs agriculs vegnan a stuair sauar. Sche la plievgia na vegn betg proximamain, pudess ins instradar restricziuns, entant che il privel d'incendis, gia marcant en il Vallais, duess s'augmentar. Per il mument n'è la situaziun anc betg critica sin nivel naziunal, tenor l'Uffizi federal per l'ambient (UFAM). Cun plievgia sa midass la situaziun natiralmain. Tenor MétéoSuisse restan ils proxims dis però sitgs. La plievgia pudess vegnir l'emna dals 14 als 20 d'avrigl.