«Mes cor batta per la razza brina» di Paul Caduff, il president da Bruna Grischuna, la federaziun che s'engascha per la tratga da vatgas da la razza brina. Blers onns ha il Lumnezian lavurà sco taxader da biestga ed uschia selecziunà buns gens per la razza. Ussa maina el en Lumnezia l'agen bain puril e s'engascha sper il presidi er sco expert ad exposiziuns.
La razza brina è ina vatga ideala per nossas regiuns.
Exposiziuns e titels: il motor per ina razza
Paul Caduff è persvadì ch'exposiziuns, titels e distincziuns èn da gronda impurtanza per ina razza. Uschia possian ils purs ed allevaturs preschentar lur lavur. Ed il medem mument hajan vatgas cun buns gens - ed uschia cun in u l'auter diplom ni schizunt cun in titel - dapli valur. Dal bun num da las singulas vatgas e dals allevaturs profita dentant er Bruna Grischuna. «En Svizra han las vatgas grischunas in bun num,» dì Caduff.
«La Brina» – ditg l'unica vatga en il Grischun
La Brina era en il Grischun fin ils onns 1960 la vatga unitara. Oz è quai auter. A partir dal 1967 han ins cruschà las Brinas originalas cun las Brinas americanas per pudair producir dapli latg. Enstagl da 3500 enfin 4000 kilos latg per onn dattan las Brown-Swiss duas giadas tant latg.
Oz ves'ins uschia passa 30 razzas da muvel sin ils pastgs en il Grischun. En ils «Cuntrasts» da Radiotelevisiun Svizra Rumantscha avain mussà il 2017, tge vatgas ch'i dat tut sin las pastiras en il Grischun.
Betg mo razzas en discussiun, mabain era la corna
Grondas discussiun ha chaschunà Iniziativa davart las vatgas cun corna che pretendeva il 2018 da sustegnair puras e purs che na fan betg giu la corna a las vatgas.
L'iniziativa ch'è vegnida refusada a l'urna ils 25 da november 2018 cun 55% na en Svizra e 51% na en il Grischun.
Or da l'archiv:
L'avrigl 2024 han trais allevaturs grischuns pudì nudar in success cun lur vatgas tar il campiunadi europeic ad Imst en l'Austria. Era auters fatgs interessants davart la vatga èn gia stads tema tar RTR.