Sut la via dal Güglia a Cunter vegnan construidas las trais chasas Vista Bursa, Vista Ratitsch e Vista Lass cun ina vista libra ed impressiunanta en la val. Las abitaziuns han almain 107 m², adempleschan il standard Minergie-P e cumpiglian in indriz fotovoltaic. En tut datti 13 abitaziuns da 4,5 stanzas, ina da 3,5 stanzas ed ina da 5,5 stanzas. Ina tala abitaziun custa tranter 700'000 e 940'000 francs. Il terren resta en possess da la vischnanca da plaiv, il tschains (dretg da construcziun) custa tranter 77 e 128 francs al mais.
Naginas segundas abitaziuns
Las abitaziuns èn emprimas abitaziuns, vul dir ils cumpraders ston avair las scrittiras en il Surses. Per la vendita da las 15 abitaziuns èn responsablas duas firmas da Savognin - ina è la Curvér-immobilias e Fiduziari SA. Ils plans ha fatg ina firma da Cuira. La lubientscha da bajegiar è gia avant maun, ils plans prevesan da cumenzar cun las lavurs da construcziun questa stad.
En quella grondezza è quai l'emprim project en Val Surses.
Cun esser tut emprimas abitaziuns è la sfida da vender ellas bler pli auta che sch'ins avess era anc segundas abitaziuns ch'ins pudess vender ad esters. Ma quai saja tar quest project mai stà in tema, di l'expert d'immobiglias Manfred Fiegl. Uss saja dentant interessant da guardar sche la dumonda suenter abitaziuns per indigens saja propi uschè gronda sco che tuts din.
