Dapi il settember da l'onn passà è la staziun da parturir da l'ospital da Tusaun serrada. La staziun da parturir vegn serrada ussa definitivamain. Quai han decidì las 24 vischnancas purtadras da la fundaziun «Gesundheit Mittelbünden» en ina radunanza extraordinaria. Il cussegl da fundaziun aveva proponì la serrada.
Motiv principal: spargnar
Cun quel pass spera la fundaziun da reducir il deficit dal manaschi e sbassar ils custs per las vischnancas. Malgrà ch'ins vuleva tegnair ina staziun da naschientscha a Tusaun: mantegnair tut las purschidas e tuttina vegnir ord las cifras cotschnas na saja betg pussibel. Il cussegl da fundaziun ha vesì tar la staziun da parturir il pli grond potenzial da spargnar.
Sco che la fundaziun scriva en ina communicaziun, na sustegnia er la strategia da sanadad chantunala betg la staziun da parturir. Tenor quella strategia dovria en il nord dal Grischun be ina staziun da parturir, numnadamain quella a Cuira. Plinavant n'hajan ins betg chattà il persunal qualifitgà. La fundaziun fa dentant attent ch'i dettia vinavant ina purschida ginecologia ed uras da consultaziun tar ina hebamma.
A la conferenza da medias è er vegni preschentà Sandro Pirovino sco nov directur. El succeda a Marco Oesch.
Sandro Pirovino era enfin uss manader dal manaschi operativ da l'ospital ed ha en quella funcziun er sa participà vid l'elavuraziun da la nova strategia. El enconuschia ils collavuraturs ed haja ina buna rait. El surpiglia il post da CEO il prim da matg 2025.
Cun la serrada definitiva sa mussa er la nova strategia da l'ospital, numnadamain da betg pli vulair porscher e metter tut sut ina fundaziun. Uschia n'è per exempel er la pratica da medis d'uffants betg pli sut la fundaziun. In auter pass da restructuraziun è la sminuaziun da la direcziun dad otg persunas sin tschintg.
I fa fitg mal ed è fitg emoziunal.
Situaziun finanziala difficila
L'ospital da Tusaun sa chatta en ina crisa finanziala. Sco auters ospitals dal Grischun scriva era quel da Tusaun cifras cotschnas – l'onn 2023 eran quai 8 milliuns francs, per l'onn 2024 è er previs in deficit dad 7 milliuns. Pervi dals problems finanzials e structuras aveva la fundaziun instradà il 2023 mesiras immediatas per segirar il provediment da sanadad en la regiun.
Las vischnancas purtadras avevan il settember passà decidì da mantegnair la purschida. Cun 160 mesiras vuleva l'ospital dentant daventar pli effizient – tranter auter cun reducir il dumber da letgs per 20%. In studi fatg dacurt recumonda dentant da sbassar la purschida. Perquai han las vischnancas purtadras decidì uss unanimamain da redimensiunar l'ospital. Fin la fin da l'onn duai la transfurmaziun capitar. Sco che la fundaziun scriva veglian ins mantegnair las plazzas da lavur e porscher ina purschida innovativa – per exempel cun pli fermas collavuraziuns u cussegliaziuns sin distanza.
Cunter la serrada da la partiziun da parturir hai er dà ina petiziun. Bunamain 4'000 persunas avevan suttascrit la petiziun che pretenda, da betg schliar la partiziun da naschientschas en l'ospital da Tusaun. La petiziun era vegnida lantschada l'entschatta fanadur.
Adattà al tema
La situaziun dals ospitals en Svizra vegn onn per onn pli dramatica. Adina dapli instituziuns da sanadad fan deficit – er en il Grischun. Ina part da la politica pretenda ussa da la Confederaziun da surpigliar dapli responsabladad – era cun pudair serrar ospitals, sch’ils chantuns na vegnan betg da sa cunvegnir. Ils cussegliers dals chantuns Stefan Engler e Martin Schmid han discutà davart la situaziun en l'emissiun Controvers.