Pervi da problems finanzials e structuras aveva la fundaziun instradà il 2023 mesiras immediatas per segirar il provediment da sanadad en la regiun. Tranter auter era la partiziun da naschientschas vegnida serrada temporarmain.
Passa 80 mesiras e scenaris per l'avegnir
Ina taskforce interna ha concretisà ed implementà cun agid dad experts externs passà 80 mesiras per reducir marcantamain ils custs. Plinavant han experts externs er evlauà models per l'avegnir da l'ospital. Quella lavur ha mussà ch'in model alternativ e bler pli bunmartgà fiss en la teoria bain pussaivel. En la pratica na saja quai dentant cunzunt ord vista giuridica e politica strusch pussaivel. In center ambulant da sanadad e cass d'urgenza na sa lascha betg realisar giuridicamain. Ina fusiun cun la regiun d'ospital da la vallada dal rain da Curia na vegnia betg en dumonda.
I dovra dapli pazientas e pazients e sustegn dal chantun
Per che l'ospital da Tusaun haja ina schanza realistica da survivier, stoppia il dumber da cas vegnir augmentà – tranter auter cun gudagnar enavos la fidanza da la populaziun regiunala. Plinavant pretendan las vischnancas ch'il chantun adatteschia il dretg chantunal ed augmentia ses sustegn finanzial. Quai saja essenzial sper spargnar ed augmentar il dumber da cas. Las vischnancas na possian betg pli purtar sezzas ils defizits, han ditg ils presidents da las regiuns Viamala ed Alvra, Curdin Capaul e Luzi Schutz. En quest connex beneventan els la revisiun planisada da la lescha per promover la tgira da malsauns.
Petiziunarias cuntentas
Las petiziunarias ch'avevan rimnà passa 4'000 suttascripziuns per mantegnair la partiziun da naschientschas, beneventan la posiziun da vischnancas. Ellas han appellà da nizzegiar questa decisiun sco schanza, da nizzegiar las purschidas per il temp da gravidanza sco er las ulteriuras purschidas da l'ospital. Per la partiziun da naschientschas tschertga l'ospital uss persunal qualifitgà.
Peter Peyer davart las aspectativas da l'ospital
Tenor il minister da sanadad Peter Peyer saja als responsabels enconuschent ch'il chantun augmentia las prestaziuns d'utilitad publica per 5,5 milliuns – quai dentant be sch'er il Cussegl grond dat ses consentiment. Quella summa vegnia lura repartida tranter tut ils ospitals en il Grischun. Tgi che survegn quant n'è anc betg enconuschent.
Ultra da quai vegnan las leschas adattadas, uschia ch'ils ospitals han dapli libertad da sa transfurmar. Quai possia avair avantatgs sco er dischavantatgs e stoppia vegnir decidì da las vischnancas purtadras. Insumma saja la responsabladad ch'i dettia avunda persunal spezialisà e che la finanziaziun necessaria saja garantida, cunzunt chaussa da las vischnancas purtadras.
