A partir dal prim da settember surpiglia l’Ospital chantunal dal Grischun temporarmain las pagliolas da l’ospital da Tusaun. Cun questa mesira veglia el far frunt a la mancanza acuta da persunal qualifitgà. La purschida areguard las controllas da gravidanza e ginecologia restia uschia sco d'enfin qua. En l'entira Svizra datti ina mancanza da spezialistas, ginecologas e da spendreras.
Nus avain chattà cun l'Ospital chantunal dal Grischun in partenari excellent ed ina fitg buna soluziun per las naschientschas da la regiun d'ospitals dal Grischun Central.
Ultra da quai vegnia era stgaffì uschia il temp necessari per ponderar en moda conscienziusa davart il futur da la partiziun da l'ospital en il rom da la reorientaziun, declera Christian Rathgeb, president dal cussegl da fundaziun da la Sanadad Grischun Central. L'ospital scriva cifras cotschnas è sto ir sur ils cudeschs. L'onn passà ha el fatg in deficit da varga 8 milliuns francs.
Ina decisiun suanda quest atun
Sche la partiziun vegnia puspè averta, dependia dentant da la situaziun finanziala fitg tendida. Quest atun ston ils delegads da las vischnancas decider co ch'i duai ir vinavant cun l'ospital – e quai pertutga era la partiziun da parturir.
Nossa finamira è in provediment da sanadad da buna qualitad en las regiuns, ma quai n'è betg pussaivel en la situaziun che nus sa chattain oz. I è ina greva situaziun.
Pertutgadas da la serrada èn el mument betg mo las 7 collavuraturas, mabain era las 13 dunnas en speranza. Il persunal restia vinavant engaschà enfin ch'ils delegads da las vischnancas hajan decidì. Las dunnas en speranza sajan vegnidas infurmadas e vegnan vinavant sustegnidas e cussegliadas cura ch'i giaja per anflar schliaziuns per la naschientscha.
Entir pajais è pertutgà da la mancanza
La mancanza da spezialistas e da spezialists – spezialmain en il sectur d'assistenza al part e la ginecologia – senta l’entira Svizra fermamain. La recrutaziun da persunal spezialisà ha pudì vegnir garantida fin ussa, è dentant daventada pli difficila suenter l'evaluaziun da la reorientaziun strategica.
Las set collavuraturas ed ils set collavuraturs pertutgads da la partiziun d’assistenza al part restan engaschads tar la Sanadad Grischun Central fin che la decisiun dals delegads è prendida.
