L'ospital da Tusaun sa chatta en ina crisa. Sco auters ospitals dal Grischun scriva era quel da Tusaun cifras cotschnas – l'onn passà eran quai 8 milliuns francs. Tuttina han las vischnancas purtadras decidì avant duas emas da mantegnair la purschida sco fin ussa. L'ospital na sto dentant betg mo spargnar. 160 mesiras vul l'ospital da Tusaun prender, per daventar pli effizient en l'avignir. Bun la mesadad da quellas èn gia vegnidas lantschadas. Tranter auter è il dumber da letgs vegnì reducì per 20%. Plinavant è uss mo pli ina sala d'operar en funcziun, betg pli duas. Ma surtot vot igl spital, occupar miglier igls letgs cun paziaints dalla regiun.
L'ospital da Tusaun drova dentant surtut era dapli glieud da la regiun che fa diever da la purschida existenta. Perquai ha l'ospital mardi saira ad Andeer fatg reclama per tut las purschidas ed operaziuns che l'ospital è abel d'offrir. Il Center da tgira d'Andeer – che sa chatta mo 20 minutas davent da Tusaun – ha laschà savair ch'el appreziescha la vischinanza tar l'ospital da Tusaun.
Differentas opiniuns davart l'avegnir da l'ospital da Tusaun
Per che l'ospital da Tusaun haja ina schanza realistica da surviver, pretendan las 24 vischnancas purtadras duas chaussas: Per l'ina duai il chantun adattar il dretg chantunal ed augmentar ses sustegn finanzial. E per l'autra saja essenzial ch'il dumber da cas vegnia augmentà, tranter auter cun gudagnar enavos la fidanza da la populaziun regiunala.
Suenter la saira d'infurmaziun a Casti sa mussan ils ins persvadids, ils auters plitost betg. Ils ins giessan en l'ospital pir cura ch'i na va betg auter, sco quai ch'in participant a la sairada di: «Jau giess pir en l'ospital a Tusaun, sche jau avess mes chau sut bratsch.» Ed en in votum èsi stà d'udir ch'ins stoppia bunamain cumbatter tar ils medis da chasa ch'ins vegnia insumma tramess a Tusaun. Quels vulan plitost ch'ins giaja giu Cuira u en auters ospitals.
In sto far attent ils medis da chasa da promover l'ospital regiunal.
Er saja l'infurmaziun davart la purschida impurtanta. Quella para anc dad avair potenzial. Ins stoppia far enconuschent, tge che vegnia tut fatg en l'ospital. Ed era la politica saja dumandada: Il Chantun e la Confederaziun stoppian vegnir activs ed adattar las leschas.
Grond interess per las occurenzas d'infurmaziun
En tut hajan radund 500 persunas visità las trais occurrenzas d’infurmaziun en la regiun, ha ditg Christian Rathgeb, il president dal cussegl d’administraziun da la sanadad Grischun Central. La davosa saira d’infurmaziun è stada ad Andeer. Ins stoppia mussar preschientscha, ha ditg Rathgeb. Ins stoppia ir ora en la regiun e prender resguard sin ils basegns da la populaziun. Perquai ins fetschia era in’enquista, per sentir ils basegns da la populaziun e dals medis en la regiun.
Blers votums positivs
A la saira d’infurmaziun ad Andeer èn stads da sentir blers votums positivs. Blers da la regiun apprezieschan la vischinanza dal ospital. Era Gian Catrina, il president dal center da tgira Glienda d’Andeer ha ditg sin dumonda dad RTR, ch’el apprezieschia il spital da Tusaun, cun il tal ins haja fatg bunas experientschas. Era la glieud saja cuntenta, da betg adina stuair ir fin a Curia per in tractament. Quai saja bain ina cumadaivladad, ma quella vegnia appreziada da la glieud.
