Il problem da liquiditad dal Center da sanadad Savognin è schlià per il mument, cun la decisiun da la radunanza communala da Surses ils 7 d'avrigl. Quella ha approvà la contribuziun da manaschi à fonds perdu cun 201 cunter 5 vuschs. Preschentas en la sala communala Grava eran 220 persunas cun il dretg da vuschar. Discussiuns pli grondas n'hai betg dà avant las votaziuns.
Sco la vischnanca da Surses communitgescha, dovra il Center da sanadad ils dus milliuns francs per pudair pajar plirs mais las pajas, e per investiziuns che sajan d'exequir. La decisiun da la radunanza communala è suttamessa al referendum facultativ.
Pirla amara per Surses il december
Curt suenter la saira d'infurmaziun ha la radunanza communala decis ils 9 da december – che la vischnanca surpiglia il deficit da dus milliuns francs dal Center da Sanadad Savognin. Questa decisiun è crudada cun approvar il budget da la vischnanca dal 2025.
La primavaira 2025 ston lura ils responsabels dal center preschentar in plan concret per ch'il center survegnia insumma ils daners. Il suveran ha lura era da decider sch'ils daners vegnan pajads. Il mument manca al center la liquiditad.
Nagin ospital temporar
Ad ina saira d'infurmaziun han las differentas cuminanzas d'interess dal Center da Sanadad Savognin SA ed il comité d'iniziativa «reorganisaziun Center da Sanadad Savognin» infurmà davart il stan actual. Igl è vegnì punctuà ch'il Center da Sanadad duaja restar sin la glista d'ospitals chantunala. I saja en mintga cas pli prudent da surpigliar ils deficits da l'agen ospital che da pajar in'indemnisaziun ad in auter ospital. Il center saja memia impurtant per la regiun per simplamain laschar crudar. Il cussegl administrativ dal Center da Sanadad aveva proponì il settember da be laschar avert l'ospital durant l'enviern. Questa idea n'è uss dentant nagin tema pli.
La varianta dad in ospital be d’enviern è per il mument giud maisa. Ils resuns da la populaziun han mussà che quell’idea na fiss vegnida acceptada da la populaziun.
L'onn passà ha il Center da Sanadad Savognin numnadamain fatg in deficit da 1,68 milliuns francs. Il president communal ha dentant ditg a la saira d'infurmaziun che l'ospital vegnia er en avegnir a far deficits e ch'i na va betg senza sustegn dal maun public.
I vegn en avegnir adina ad esser uschia che la vischnanca ha da purtar ils defficits da l'ospital. Quant grond e quant aut che quels daventan stuain nus uss evaluar. Fin la primavaira stuain nus savair quant aut che quels deficits daventan.
Surses cumbatta per l'ospital
Suenter che il Center da Sanadad aveva preschentà questas ideas il settember è sa furmà resistenza: ina gruppa d'interess cumbatta per l'avegnir da l'ospital. Durant sairas da discussiun è vegnì discutà davart ideas co che l'ospital pudess exister vinavant en l’avegnir. Preschents a las sairas èn stads represchentants dal Center da sanadad, da la vischnanca da Surses, e petiziunaris che vulan salvar l'ospital. Luzi Thomann ha organisà las sairas da discussiun.
Plinavant è l'october vegnì inoltrà in'iniziativa che pretenda da reorganisar il Center da sanadad. Passa 400 persunas cun il dretg da votar hajan suttascrit quella, sco la vischnanca da Surses aveva communitgà. Necessarias fissan stadas 100 suttascripziuns. La vischnanca ha peda in onn per tractar l’iniziativa e laschar votar. L’iniziativa pretenda ch’i vegnia elavurà ina lescha, ch’il Center da Sanadad Savognin garanteschia ils meds finanzials necessaris per il provediment da basa staziunar e medicinal. L'iniziant da questa acziun è Guido Luzio. Envers RTR ha el ditg a la saira d'infurmaziun ch'el fiss pront da retrair l'iniziativa, sch'ils responsabels chattan ina soluziun per l'avegnir.
Sch’els pon garantir ch’il Center da sanadad po vegnir mantegnì, sun jau pront da retrair l’iniziativa.
Or da l'archiv:
La situaziun dals ospitals en Svizra vegn onn per onn pli dramatica. Adina dapli instituziuns da sanadad fan deficit – er en il Grischun. Ina part da la politica pretenda da la Confederaziun da surpigliar dapli responsabladad – era cun pudair serrar ospitals, sch’ils chantuns na vegnan betg da sa cunvegnir. Ils cussegliers dals chantuns Stefan Engler e Martin Schmid èn stads giasts en il Controvers.