Il Center da Sanadad Savognin ha fatg l'onn passà ina sperdita da stgars 1,7 milliuns francs. La raschun per quest resultat sajan d'ina vart ils cas ambulants e staziunars ch'èn sa sminuids. Da l'autra vart sajan ils custs da persunal dentant creschids, sco il president dal cussegl d'administraziun dal center da sanadad Peder Cathomen ha detg vers RTR.
Il mument senza contract cun Tusaun
In grond post per il deficit è er il servetsch da salvament Grischun Central. La collavuraziun cun il spital da Tusaun, ch'ha scrit in deficit da passa 8 milliuns francs il 2023, saja per il mument sistida da tuttas dus varts di Cathomen. Ina fusiun saja insumma nagin tema. Ina pussaivladad saja da chattar collavuraziuns, quellas ins tschertga dentant er cun autras organisaziuns.
Per Peder Cathomen èsi cler: il center da sanadad Savognin vegnì a dar er en futur. Las sfidas da spargnar ed uschia vegnir tar liquiditad sajan natiralmain grondas. Il futur dal center, forsa er en in'autra furma e cun auters servetschs, saja dentant garantì, in servetsch da basa vegni adina a dar – er perquai ch'il chantun tegna il mument vi da las regiuns da spital.
En la stagiun bassa restian ils letgs da l'ospital savens vids, il persunal è dentant tuttina preschent. Perquai sajan la liquiditad e las investiziuns en il mantegniment dals edifizis e da l'infrastructura periclitadas. Sch'il concept da manaschi actual vegnia mantegnì, na sa megliereschia la situaziun era betg en l'avegnir, ha Cathomen confermà vers RTR. Il Center da Sanadad Savognin saja perquai en il process da tschertgar meglras strategias.
