Il suveran da la vischnanca da Surses ha acceptà cun gronda maioritad il preventiv 2025. Quai malgrà che quel prevesa in deficit da bun dus milliuns francs e bain savend ch'ins sto garantir la liquiditad da l'ospital regiunal. Il cussegl d'administraziun e la direcziun dal Center da sanadad Savognin ston ussa ir sur ils cudeschs e preschentar fin la primavaira schliaziuns e propostas co vegnir or da las cifras cotschnas.
Per il president communal da Surses, Daniel Wasescha ch'è ussa in onn en uffizi, èsi stà tut auter che simpel da preschentar a la radunanza communala per l'emprima giada en l'istorgia da la vischnanca fusiunada in preventiv cun in minus.
RTR ha suenter la radunanza communala discurrì cun Daniel Wasescha:
RTR: La vischnanca da Surses ha preschentà per l'emprima giada in preventiv cun cifras cotschnas. Quant fitg ha la tractanda dal preventiv dà sin il stumi a Vus avant la radunanza?
Daniel Wasescha: Igl era schon en in zic tensiun en questa tematica. Il preventiv per l'onn proxim mussa in grond deficit.
Preschentar in tal preventiv na fa betg plaschair. Quai è uschia.
- president communal da Surses dapi l'entschatta dal 2024
- lavurà passa 20 onns tar RTR en il sectur da las resursas umanas
- maridà e bab da trais uffants
- oriund da Savognin
Il deficit vegn chaschunà dal Center da sanadad Savognin. I sa tracta da circa quests dus milliuns francs. Interessant è entant ch'il plan da finanzas na prevesa betg ch'i dettia era vinavant in minus dal center da sanadad. E quai vegnì fatg a moda sappientiva u è quai naiv da betg preschentar quai?
Na, i n'è ni sappientiv ni naiv. Il plan da finanzas per ils proxims onns è budgetà senza questa contribuziun. Quella vegn tractandada l'onn proxim ed alura resguardain nus quest import ch'il suveran vul.
Perquai datti pia ina radunanza la primavaira proxima nua ch'i va per quests dus milliuns francs ch'il suveran ha deliberà glindesdi saira – pro forma quasi. Il cussegl da l'administraziun e la direcziun dal center da sanadad ston ussa ir sur ils cudeschs, preschentar la primavaira schliaziuns e propostas. Quant optimistic essas da vart da la vischnanca ch'ins vegn da sbassar quests deficits?
Tar l'import da quests dus milliuns francs che la radunanza communala ha approvà, però anc betg approvà definitiv ch'ins po era dar ora, vai per dar liquiditad al center da sanadad. Quai è in import unic e suenter ston ins parallel er ir sur ils cudeschs cun il center da sanadad, uschia ch'i vegn preschentà in meglier resultat davart il qual il suveran po alura decider e respunder la dumonda: Vulain nus quai uschia u na vulain nus betg quai? Igl è far la differenza tranter quest pajament unic per la liquiditad ed il deficit structural che vegn a restar.
Ins po pia gia ussa dir ch'i dat in deficit a lunga vista – in deficit structural. Il center da sanadad vegn pia vinavant a scriver cifras cotschnas?
Previs è da preschentar differentas mesiras cun si quant che quai vegn a custar, respectivamain quant ch'ins po spargnar u sminuir il deficit ed il suveran po alura decider. Ma concret tge ch'ins vegn a preschentar la primavaira, quai na pudain nus il mument anc betg dir.
Per Vus è quest preventiv stà l'emprim che Vus avais dastgà preschentar u stuì preschentar sco president communal. In deficit cun cifras cotschnas. Quant mal fa quai savend ch'i gieva finanzialmain bain a la vischnanca – almain ils davos onns?
Cler. Preschentar in tal preventiv na fa betg plaschair. Quai è uschia.
Ed ins spera natiralmain sco president communal ch'ina tala situaziun na sa repeta betg da onn tar onn e ch'il mal il venter na vegn betg pli grond pervia dal Center da sanadad?
La vischnanca fusiunada da Surses exista ussa dapi nov onns. Ils emprims onns hai adina dà gudogns u buns quints annuals e perquai datti era tschertas reservas che la vischnanca ha. Però a lunga vista na savain nus betg preschentar tals preventivs cun in minus ed era betg uschè autas investiziuns. Quai na va simplamain betg.
Or da l'archiv:
