Naginas operaziuns pli a partir da la fin da l'onn ed ina staziun da letgs datti mo pli durant trais mais da l'enviern – quai èn duas da diversas mesiras ch'il Center da Sanadad Savognin SA ha preschentà per ses ospital mesemna saira a la populaziun ed al persunal. Las ideas na fruntan betg sin grond'acceptanza tar las passa 400 persunas ch'han visità la saira d'infurmaziun.
La pratica dal Center da Sanadad Savognin duai dentant er en l‘avegnir restar averta durant l‘entir onn. Infiltraziuns, anestesias localas ed operaziuns pitschnas en la pratica duai quai vinavant dar a Savognin. Quantas plazzas che pudessan ir a perder pervi da las mesiras n'è betg vegnì ditg a la saira d'infurmaziun. Peder Cathomen, il president dal cussegl d'administraziun dal Center da Sanadad Savognin SA ha però ditg envers RTR, ch'el na quintia betg da stuair reducir il persunal per dapli che diesch fin quindesch persunas. Actualmain lavuran radund 120 persunas per l'ospital e la chasa da tgira. En plazzas cumplainas èn quai stadas 88 l'onn passà.
Ospital cun cifras cotschnas
Las mesiras preschentadas duain gidar l'ospital dal Center da Sanadad Savognin da puspè scriver cifras nairas en l‘avegnir. L‘onn passà ha quel numnadamain fatg in deficit da 1,68 milliuns francs. Ils 9 da december vul la radunanza communala da Surses infurmar en detagl sur da la situaziun finanziala. Sco quai che Daniel Wasescha – il president communal da Surses – ha ditg envers RTR, duai il suveran alura pudair decider tge purschidas che sajan giavischadas da l'ospital a Savognin. Fin lura vegnian ins era a reponderar las mesiras da spargn previsas, ha ditg Wasescha che fa era part dal cussegl d'administraziun dal Center da Sanadad Savognin SA.
Valitaziun da l'expert
L’onn passà ha il spital da Savognin anc fatg 19 operaziuns, dus onns avant eran quai anc prest dubel uschè bleras. Perquai ha il Center da Sanadad Savognin decidì da serrar la staziun d’operar sin la fin da l’onn. Sco quai che l’expert e cussegliader da spitals Gian Arard Melcher ha ditg envers RTR, na fetschia betg senn, da mantegnair tut l’infrastructura d’operar per mo far paucas operaziuns ad onn. Quai custia memia bler da mantegnair l’infrastructura, era vegnan las pretaisas legalas adina pli stretgas per far operaziuns.
Sch’in spital stagiunal ch’ha avert mo durant la stagiun da l’enviern metta Melcher pero en dumonda. Bain dettia divers spitals regiunals cunzunt en regiuns turisticas ch’hajan dapli letgs en la stagiun auta e reduceschian ils letgs en la stagiun bassa. En l’exempel da Savognin saja d’empruvar ora, sch’i saja pussaivel d’avair in menaschi stagiunal: “Las fidas las pli grondas èn da chattar u avair il persunal qualifitgà”. In’autra sfida saja da communitgar a la glieud correctamain, cura ch’il spital saja avert e cura ch’el saja serrà.
