Per questa petiziun èn vegnidas rimadas passa 3'500 suttascripziuns. Ils iniziants da l'uniun Campax – in moviment burgais progressiv – spetgan da l'uniun da commerzi e mastergn da Tavau, ch'ella appelleschia a lur commembers da betg pli publitgar inserats en la «Gipfel Zytig».
Signur Schneider è gia vegnì sentenzià trais giadas pervi da quai, ma quai n'al tegna betg si – el fa simplamain vinavant.
Il december ha Heinz Schneider publitgà in maletg: d'ina vart la veglia Roma cun chasas impressiunantas e sura il text: «Italia avant 2'000 onns.» Dasperas era in maletg d'ina chamona simpla cun tetg da strom, sura il text: «Africa avant circa 30 minutas.»
La petiziun è vegnida surdada al president da l'uniun da commerzi e mastergn, Boris Bossi. El di ch'el na possia betg prescriver a ses commembers nua ch'els possian inserar tge, tuttina mettia el quai a cor als commembers. Bossi di vinavant, ch'el veglia tschertgar il discurs cun l'editur da la «Gipfel Zytig», Heinz Schneider. Lez n'è anc betg s'exprimì davart la petiziun e la critica.
Or da l'archiv:
Gist l'enviern 2023 è Tavau gia stà amez l'attenziun mediala pervi da reproschas da discriminaziun – lezza giada cunter ils giasts da vacanzas gidieus ortodox. In restaurant ha procurà per in eclat perquai ch'el ha refusà da laschar prender ils giasts gidieus a fit scarsolas. «Pervi da giasts gidieus hai dà divers incidents displaschaivels», declera il restaurant sia decisiun sin in placat. Questa situaziun ha mo anc rinforzà las tensiuns tranter ils indigens da Tavau ed ils giasts gidieus ortodox.