Gia dapi l'onn 2013 vegn la halla da gimnastica da la scola primara «Bünden» a Tavau transfurmada durant il WEF en in post da sanitad. Durant duas emnas è il militar en acziun sin l’areal da scola. Nov dis è la halla da gimnastica serrada cumplettamain per ils uffants.
La petiziun «Nagin militär en chasa da scola Bünden» pretenda uss che la vischnanca na dettia betg pli a fit la halla per il militar. L'inizianta da la petiziun è la parlamentaria da la PS Linda Zaugg.
Nus disturba che la halla da gimnastica na po betg vegnir utilisada durant quest temp per il sport da scola, per la maisa da mezdi ed er per autras activitads dal temp liber.
-
Bild 1 von 2Legenda: La halla da gimnastica da la scola primara «Bünden» vegn transfurmada durant il WEF en in post sanitar. RTR -
Bild 2 von 2Legenda: La halla da gimnastica da la scola primara «Bünden» vegn transfurmada durant il WEF en in post sanitar. RTR
In segund punct saja la segirezza. Cun il traffic supplementar e pervia dals camiuns sajan ils uffants periclitads sin lur viadi a scola. Linda Zaugg declera plinavant ch’i dettia geniturs ch’hajan fadia cun armas sin l’areal da scola.
Il directur da las scolas da Tavau Martin Flütsch ha chapientscha per ils geniturs preoccupads. Ma el chatta che las restricziuns sajan limitadas a curt temp e perquai supportablas.
Il manaschi da scola cuntinuescha tut normal. I na croda betg ora ina suletta lecziun. I dat però alternativas, per exempel emprendan tut ils uffants durant quest temp d'ir cun skis.
Er Linda Zaugg appreziescha ch’ils uffants da Tavau pon ir gratuit cun skis durant il WEF. Ma questa purschida na saja betg ina cumpensaziun per la halla da gimnastica occupada. Zaugg di plinavant ch’ella n’haja betg lantschà l’iniziativa be per sasezza, mabain perquai che blers geniturs hajan dumandà ella sch’ins na possia betg far insatge. I dettia dentant be paucas persunas che sajan prontas d'era s’exprimer publicamain. Memia gronda saja la tema da survegnir il bul da l’adversari u l’adversaria dal WEF.
Dapli che politica simbolica?
Entant han bun 400 persunas suttascrit la petiziun. Ils proxims dis vegn ella inoltrada a la vischnanca e lura controllada.
Grondas speranzas per ina midada na datti però betg. Gia il december avevan ils responsabels e las responsablas da la vischnanca signalisà vers l’inizianta che tut vegn probabel a restar sco quai ch’igl è. E sin dumonda da RTR scriva la giunta dal WEF: «Per pudair garantir in manaschi optimal d'in post d'agid sanitar ston tscherts criteris vegnir ademplids, sco p.ex. avunda spazi en ed enturn l'edifizi, in lieu central sco er in bun access per transportar pazients. La halla da gimnastica «Bünden» ademplescha tut quels criteris.»
Per pudair garantir in manaschi optimal d'in post d'agid sanitar ston tscherts criteris vegnir ademplids. La halla da gimnastica «Bünden» ademplescha tut quels criteris.
Tenor questa resposta na pon las petiziunarias ed ils petiziunaris betg far grondas speranzas. Lur giavisch mussa però che er sche la gronda part dals indigens n’è da principi betg cunter il WEF, procuran las malempernaivladads colliadas cun quel mintgatant per pitschnas protestas.