Per bundant in'emna sa transfurma Tavau en in lieu mundial. Ils egls e las ureglias internaziunalas èn drizzadas sin la vischnanca. Indigenas ed indigens èn en in dilemma durant quels dis. D'ina vart porta il WEF blers giasts e daners a Tavau e da l'autra vart datti restricziuns che na plaschan betg. La vischnanca da Tavau organisescha adina puspè maisas radundas cun indigens e represchentantas dal WEF per pudair chattar meglras soluziuns: saja quai per il traffic durant quels dis u per ils pretschs da stanzas ch'èn era problematics en ils egls dals organisaturs dal WEF.
In'autra vischnanca
Sch'ins passa durant il WEF tras la promenada da Tavau n'enconusch'ins strusch pli quella. Quella daventa quasi in pitschen Time Square. Plain colurs ed inscripziuns sa preschenta la via che survegn era novs bajetgs durant il forum mundial d'economia. Quest'onn han var 150 projects per fabricats survegnì ina lubientscha. Igl èn firmas u era represchentaziuns da pajais che laschan fabritgar locals u fittan butias durant il WEF per far lur eveniments dasper il WEF. Tut quai che succeda numnadamain ordvart il center da congress n'è betg part dal forum uffizial.
Adina puspè aud'ins che cun affittar las butias fetschian las possessuras ed ils possessurs da quellas in bel affar.
Jau tem ch'ils indigens na vegnan betg pli en mia butia.
Dentant n'è quai betg adina bainvis. Tgi na vul betg affittar ord aspects morals e tgi sto affittar per avair avunda entradas. Tschertas butias han era fixà en il contract ch'ins sto rumir la butia durant il WEF. Per la paja pon ins star durant l'onn per in fit pli bunmartgà.
Blers daners per paucs letgs
L’Uniun d'hotel e gastronomia da Tavau ha ina cunvegna interna: Quella prevesa ch'ils pretschs pon s'augmentar durant il WEF per 30 fin 40% en congual cun ils pretschs dals dis da festa. Dentant betg tuts e tuttas sa tegnan vi da quai. Adina puspè ves'ins stanzas che vegnan purschidas per pretschs fitg auts, cunzunt da persunas privatas che affittan lur abitaziuns. Ins na possia betg restrenscher il martgà liber en quel reguard, hai num da vart da la vischnanca da Tavau. Pretschs per stanzas sur 20'000 u 30'000 francs ves'ins adina puspè. Entant che la purschida è pli pitschna che la dumonda na sa lascha il problem betg schliar tenor expertas ed experts. Ed entant che la glieud paja, na sa sbassian ils pretschs era betg.
Il «Spirit of Davos»
Il lieu da congress sco tal vegn adina puspè ludà da participantas e participants dal forum. La pitschna citad alpina haja in atmosfera speziala che pussibiliteschia discussiuns interessantas. L'atmosfera vegn numnada «Spirit of Davos». Tar quel tutga dentant era la festa suenter la discussiun. Quella vegn tranter autra era fatga en la Piano Bar da l'Hotel Europe.
Leonardo Di Caprio ha chantà en questa bar.
Participantas e participants dal WEF turnan adina puspè per l'atmosfera intima che il forum porschia.
Reclama inpajabla
Mintg'onn vegnan cun il WEF era ina schurma schurnalistas e schurnalists da tut il mund a Tavau. Passa 400 persunas rapportan dal forum e portan il num ed ils purtrets da Tavau en las stivas sin tut il mund. «Per nus è quai ina reclama enorma» di la responsabla per la communicaziun da la destinaziun da turissem Marlies Seifert.
Il WEF emplaina ils letgs durant la stagiun morta. Quai è bun per Tavau.
Tiers vegn che las pistas da skis sajan quasi vitas durant il WEF. Uschia che cunzunt indigenas ed indigens giaudan las pistas uschia sco uschiglio mai.
Segirtad custa
L'armada svizra sustegna er quest onn il chantun Grischun per segirar il Forum mundial d'economia. En acziun èn maximalmain 5'000 commembras e commembers da l'armada. Quels èn tranter auter responsablas per proteger l'infrastructura ed il spazi aviatic. Quai capita er en stretga collavuraziun cun l'Austria e l'Italia. A l'armada stattan a disposiziun 32 milliuns francs. Enavant datti anc in preventiv da 9 milliuns francs che vegnan finanziads da la Confederaziun, dal chantun Grischun e dal WEF.
Gronda critica
L'inscunter da l’elita mundiala stat sut gronda critica. Mintg'on datti era demonstraziuns. Quest onn èn vegnidas annunziadas dus demonstraziuns da la gruppaziun «Strike WEF». Tenor els s’entaupan capitalists, dictaturs ed auters explotaders ch'han betg l’intenziun da megliurar il mund. Ils «ritgs e pussants» fetschian entras lur engurdientscha da profit mo vegnir mendra la crisa da clima, guerras e la malgistadad sen tiara.