Proxim enviern èn ils gieus olimpics da l'Italia, era a Livigno. Durant ils gieus olimpics n'èsi betg pussibel da viagiar cun l'auto privat a Livigno. Il concept da traffic prevesa in servetsch da bus da shuttle tranter la Svizra e Livigno atras il Tunnel a Munt Laschera.
12'000 enstagl da 10'000 aspectaturs per di
Ils organisaturs dals Gieus olimpics 2026 Milano Cortina han curregì las cifras dal dumber d’aspectaturs ch'els spetgan ed augmentan quel da 10’000 per di sin 12’000 per di. In terz da quests arrivian da la Svizra anora a Livigno, rapporta il schurnal regiunal da SRF.
Quest grond dumber d’aspectaturs è ina sfida per la regulaziun da traffic en Grischun e cunzunt en Engiadina, declera Rafael Da Silva da l'uffizi da construcziun bassa dal Grischun. El è era en la gruppa da lavur ch'è responsabla per il traffic durant ils gieus olimpics il favrer da l’onn proxim.
La gronda sfidà e l’access limità da la Svizra vers Livigno. Quel access è be pussibel tras il tunnel da Munt Laschera, in tunnel privat da radund 3,5 km cun be in vial. In’ulteriura sfida è che il tunnel è in toc si per il pass dal Fuorn e cunquai fitg exponì a l’aura cun naiv e lavinas.
Da l'Italia anora datti in pass davent da Bormio e la Forcola di Livigno. Lez pass è dentant serrà sur enviern – er perquai ch'il Grischun na vul betg investir en la part svizra da la via. Bler traffic vegn pia a passar atras il tunnel Munt Laschera.
Soluziun: Park-and-Ride
Per evitar il caos da traffic en ils vitgs e sin il pass dal Fuorn èn previs perquai dus gronds parcadis avant Zernez ed en la Val Müstair. Mintga tschintg minutas van bus davent da Zernez vers Livigno e mintga mes’ura davent da la Val Müstair. Plinavant èsi previs da far in grond parcadi en vischinanza da Landquart e schlargiar la sporta da la Viafier Retica per levgiar il tunnel dal Vereina.
Tenor Rafael Da Silva è uss la sfida da chattar avunda bus ed era chauffeurs adattads per quest traject cunquai ch'ils chauffeurs stuessan esser abels da montar entaifer paucas minutas chadainas sin il bus. El è dantant da buna speranza.
Adattà al tema
