La preparaziun è anc en planisaziun. Ma Livigno vul modernisar l’infrastructura turistica d’enviern ed esser pinà en vista als gieus olimpics 2026.
Quatter projects concrets
- Il pli impurtant project vegn ad esser ina pendiculara che collia las regiuns da skis che sa chattan dretg e sanester dal vitg. Igl è previs da fabritgar ina pendiculara che traversa la val.
- Plinavant vul Livigno schliar la situaziun dal traffic cun realisar ina garascha per radund 800 autos.
- Ed amez il vitg vulan els fabritgar in center d’urgenza, cunquai ch'i na dat nagin ospital a Livigno.
- Ina da las sfidas centralas vegnan ad esser las vias per rivar a Livigno. Il pass Fuscagn che vegn dal sid ennà è gia oz bain transibel. Munt la Schera davart dal Pass dal Fuorn ennà na vegn betg da purtar tut il traffic causa il tunnel. Uschè vulan els investir en ina galaria sur «La Forcola». La finamira saja da pussibilitar d’avrir quella via durant l’enviern oravant tut per autobus.
La Lumbardia paja la gronda part
En total vegn quintà cun custs da radund 80 milliuns euros per l'infrastructura. Sustegn finanzial survegn Livigno oravant tut da la Regiun Lumbardia. Quella sa participescha cun surprender 80% dals custs. Livigno sez ha uschia da contribuir anc 20%.