Il favrer da l’onn 2026 èn ils proxims gieus olimpics a Milano Cortina. 24 medaglias vegnan scumpartidas a Livigno, numnadamain quellas per las disciplinas Snowboard e Freestyle. Livigno ha atgnamain gia oz ina bun’infrastructura per realisar quellas disciplinas. Tuttina datti intgins projects per fabritgar ora l’infrastructura existenta. Totalmain duain vegnir investids radund 100 milliuns euros, uschia il sindaco da Livigno, Remo Galli.
Pendicularas, traffic e parcadis
Previs è tranter auter ina pendiculara che duai colliar ils dus territoris da skis da Livigno d’ina vart da la val cun l’autra. In auter project, che vegn discutà gia dapi intgins onns, è la colliaziun directa cun la Svizra, il pass da la Forcola. Projects, ch'èn actualmain be sin palpiri. Che quels èn realisads enfin il favrer 2026, quai è tenor Remo Galli pauc probabel. La finamira saja però d’investir er per il futur e betg mo a curta vista, per ils gieus olimpics. In project pli concret è in parcadi sutterran. Previs è ina garascha per 500 autos. La construcziun duai cumenzar questa primavaira. Tut ils plans e las visiuns na vegnan pia betg ad esser pronts per il favrer 2026. Tuttina sajan quels impurtants, er per l'avegnir.
