Il 2029 vegn puspè ad esser in onn impurtant per atletas ed atlets cun in impediment spiertal. Lura han numnadamain lieu en Svizra ed en spezial en il Grischun ils Special Olympics World Winter Games. Sonda, ils 27 da schaner 2024 ha gì lieu ad Arosa in emprim di da preparaziun per las atletas ed ils atlets, ch'èn arrivads da tut las parts da la Svizra, en la disciplina skis.
Finamiras e sfidas
Il Di da naiv è betg mo stà l'emprim pass da preparaziun per las atletas ed atlets, mabain er per il comité d'organisaziun dals Special Olympics 2029.
Igl ha dà duas finamiras primaras declera Luana Bergamin, ch'è commembra dal comité d'organisaziun per las concurrenzas mundialas d'enviern en il Grischun: Divertiment ed organisaziun.
Las skiunzas ed ils skiunz duessan avair in bun di sin pista ed il comité d'organisaziun possia far emprimas experientschas. Il di da preparaziun, che duess en futur avair lieu mintg'onn, vegn nizzegià per pruvar or tschertas chaussas e chattar or tge che funcziuna e tge betg. Uschia er tge pista ch'è la pli adattada per realisar las cursas il 2029, manegia Nicole Riso, d'Arosa Turissem, ch'ha organisà il Di da naiv.
Finanzià vegn il di entras in fond, explitgescha Matthias Schlageter, medemamain dal biro da turissem d'Arosa. Via ina pagina d'internet pon persunas privatas ed instituziuns far donaziuns. Uschia che las atletas ed ils atlets pon participar a l'entir di – inclusiv viadi e gentar – senza stuair pajar insatge.
E natiralmain portan tals eveniments er sfidas, la pli gronda saja ch'ins haja anc mai organisà uschè in grond eveniment cun e per persunas cun in impediment. L'emprima impressiun mussa ch'atletas ed atlets cun in impediment dovran dapli sustegn che quellas senza. Tenor Luana Bergamin èsi dentant betg da metter il mund sutsura.
Igl è segir bun d'esser sensibla e da tadlar tiers bain – ma uschiglio èsi sco d'ir cun skis cun la famiglia.
Impurtant è er d'avair atletas ed atlets per las occurrenzas dal 2029. E perquai dovri en il Grischun uniuns da sport che fan pussaivel a persunas cun in impediment spiertal da far part. Quai è la responsabladad da Martina Gäumann da Special Olympics.
Ins vuless far fit las uniuns da sport per ch'ellas daventan inclusivas, ch'ellas s'avran e ch'ellas stgaffeschan purschidas per persunas cun in impediment. Plinavant duessan tuttas e tuts tant survegnir access al sport sco er a la vita sociala dals clubs. Quai fetschia Special Olympics cun accumpagnar stretgamain ils clubs da sport. Per ch'ins haja la finala ina pluna atletas ed atlets en il Grischun che pudessan participar als Special Olympics 2029 en patria.
