L'enviern passà va en l'istorgia sco onn spezial, gea perfin extraordinari, di Christoph Marty ch'è climatolog tar l'Institut federal per la perscrutaziun da naiv e lavinas a Tavau (SLF). In enviern cun pauca naiv n'è sin l'emprima egliada betg extraordinari, tals envierns hai adina puspè dà ils ultims decennis. Ma la repartiziun da la naiv saja stada speziala.
Igl hà da paucs dis da naiv. Ma cura ch'i ha navì hai dà naiv fin en regiuns pli bassas.
Naiv intensiva hai dà l'enviern 2024/25 l'emprima giada vers la fin dal november e lura anc ina giada enturn Nadal. Uschiglio è la dunna Holla stada fitg spargnusa. Ils dis ch'igl ha pudì naiver, hai dentant navì fin en regiuns pli bassas. Tenor Christoph Marty saja quai il motiv daco ch'i regia ina mancanza da naiv, spezialmain en ils auts. I saja stà in enviern fitg sitg, spezialmain en il nord dal Grischun.
Nus avain anc mai mesirà mez avrigl uschè pauca naiv sin il Weissfluhjoch sco quest'onn.
Per illustrar questa mancanza da naiv, fa Christoph Marty in exempel cun il Weissfluhjoch sur Tavau sin bun 2'500 meters sur mar. «Là avain nus actualmain circa 130 centimeters naiv. Uschè pauca naiv n'avain anc mai mesirà là durant ils 90 onns che nus faschain mesiraziuns si qua.» Il climatolog di ch'igl haja normalmain da quest temp ina cuverta da naiv da radund 220 centimeters sin il Weissfluhjoch.
Accumpagnà collavuratur dal SLF
Tgi che va cun skis sto dar in’egliada sin il privel da lavinas. Per pudair valitar lez sto l’Institut per la perscrutaziun da naiv e lavinas far differentas mesiraziuns, e quai di per di.
Il «Minisguard» ha accumpagnà Chasper Buchli dal SLF sin l’areal da perscrutaziun en las muntognas da Tavau. Ed il cool – i na va betg be per guardar quanta naiv ch’igl ha dà e sche quella è loma u bletscha, mabain anc per in’entira massa autras chaussas.