La situaziun a Tschappina
Igl è aura da t-shirt e picnic a Tschappina. Quai na fa betg surstar, tar bunamain 17 grads a Cuira e 10 grads ad Oberurmein.
Ma che la naiv patescha, quai na disturba gnanc ils giasts. In um da Turitg di: «Nus avain pir ussa vacanzas en noss chantun, ma igl è anc adina attractiv per ir cun skis». Duas dunnas èn da l'avis ch'i saja detg bun la damaun – pir il suentermezdi vegnia la naiv marscha.
Quatter runals e diesch pistas datti a Tschappina. Duas pistas n'èn gnanc pli avertas, perquai che la naiv manca. E la terza è vegnida serrada glindesdi passà. Il manader da las pendicularas Markus Hänni sto guardar che las pistas èn en urden.
Nus savain circa quanta naiv che nus avain da producir, ch'i tegna lura era enfin la fin da la stagiun.
Markus Hänni è cuntent cun questa stagiun, malgrà las notgs chaudas e plitost pauca naiv. Vi da quai ves'ins er quant impurtant ch'ina buna planisaziun a l'entschatta da la stagiun è.
Co èsi a Breil?
Igl è mezdi en il territori da skis Breil/Vuorz/Andiast. Il tschiel traglischa blau ed il sulegl stgauda il terren e las fatschas da la glieud. La pista che vegn giu a Vuorz è la suletta sdrema alva sin il prà – a sanestra ed a dretga crescha gia pastg.
Ina dunna pli veglia cun ina giacca rosa che vegn gist giu da la pista na disturban las temperaturas betg. «Jau sun ina skiunza da bell'aura», di ella. «Sch'i na ma plascha propi betg pli, alura vom jau cun la pendiculara engiu, ma fin uss hai jau adina pudì ir cun skis».
Jau sun ina skiunza da bell'aura!
I va vinavant cun la pendiculara tar la staziun da l'Alp Dado. En in edifizi ord lenn, in pèr meters sper la sutgera da l'Alp Dado, è il biro dal manader da pista e salvament Daniel Friberg. L'um giuven cun la chapitscha verda sesa al computer e guarda sin ina carta alva. Sin quella carta vesa el ils nivels da naiv da tuttas pistas en il territori, sco ch'el declera. Las maschinas da pista mesiran la naiv sut ellas cun in sensur. El guarda las colurs e discuta lura la saira cun ils manischunzs da pista, nua ch'els han da reparar la pista.
E tuttina va Daniel Friberg gugent anc sez sin pista per guardar las cundiziuns. El va tar il Fil, la pli auta staziun dal territori da skis. «Las maschinas èn bunas ed endretgas, ma jau hai blera experientscha e mintgatant gida quai dapli, sche jau vom mez giuadora», di el.
Sche nus na construin betg endretg la pista l'entschatta da la stagiun, lura na porta quai nagut pli da vulair far striegn la primavaira.
Glieud hai tuttina blera, malgrà las temperaturas. Ils chantuns en la Bassa han per part pir ussa vacanzas da scola – perquai hai blera glieud da Basilea e da Turitg. Nagin na s'agitescha pervi da las relaziuns da naiv. «Igl n'è betg perfetg, ma i basta per nus», di ina dunna giuvna.
Vers las quatter ves'ins adina pli pauca glieud. Il sulegl va a bass, il di va a fin. Ussa èsi temp per la sesida da Daniel Friberg cun ils manischunzs da las maschinas da pista. In dad els è Livio Deplazes.
Suenter in tal di chaud vegnin nus ad avair fadia da vegnir dapertut cun las maschinas da pista.
Cun suga u senza – la lavur cuntinuescha, e quai anc fin la fin da mars. E malgrà il ferm sulegl e las temperaturas autas na fan els nagins quitads ch'els ston serrar pli baud quest onn.