Dapi il 2014 datti cursas da passlung da La Diagonela en il stil classic sco er en il stil liber en l'Engiadin'auta. Da lezzas uras avevan ils organisaturs da las cursas da La Diagonela surprendì a curta vista l’organisaziun da questas cursas ch’èn part da la seria da cursas Ski Classics. Entant èn las cursas en l'Engiadin'auta s'etablidas – darar pon quellas dentant vegnir organisadas senza stuair improvisar. La mancanza da naiv u era temperaturas lunsch sut null grads han adina puspè pretais in buna purziun talent d’improvisaziun dals organisaturs.
Nova cursa «La sairada Roseg» betg sin la loipa da la Val Roseg
Gia dapi in per onns han ils organisaturs da las cursas da La Diagonela annunzià da vulair engrondir la sporta da las cursas durant l’emna. Uschia èsoi in cas da fortuna ch'ils organisaturs da l’anteriura cursa «Roseg masters» han tschertgà il contact cun ils organisaturs da La Diagonela. Lez han reactivà la cursa sco part da las cursas da La Diagonela. Pervia da la mancanza da naiv n'èsi dentant betg pussibel da currer sin la loipa da la Val Roseg. Uss datti l’alternativa da Puntraschigna direcziun Samedan ed enavos sur la loipa dal siemi.
Adattaziuns sin il traject da la cursa roiala La Diagonela
Pervia da la mancanza da naiv en l'Engiadin'auta sto era vegnì adattà il traject da La Diagonela. Sco gia avant trais onns na pon ins betg currer atras il God da Staz a San Murezzan ed era betg sin la loipa da la Val Roseg. Uschia vegn il traject da la cursa roiala scursanì da 55 sin 43 kilometers.
Ina scursanida datti era tar la cursa La Sfida da la dumengia. La cursa en il stil liber cuzza nov 24 enstagl da 28 kilometers.
