Grazia al augment dal sustegn finanzial da divers chantuns, differentas citads ed era dal program da promoziun da sport per uffants e giuvenils J&S èn champs da skis puspè daventads pli populars ils ultims onns.
Pervia da la midada dal clima dumonda quest «boom» flexibiltà ed innovaziun. Blers territoris da skis na pon betg pli segirar pistas alvas durant tut l'enviern. Perquai tschertgan scolas sco era la branscha da turissem variantas alternativas.
Emnas da skis èn er educaziun d'ambient
A prima vista para quest svilup d'esser in zic cuntradictoric. Cun prender sut la marella pli precis l'entira chaussa, sa mussa che talas emnas da skis pon perfin esser ina sort educaziun d'ambient. Letizia Strimer – magistra secundara a l'Oberstufe Wasserant Ost en il chantun Solothurn – declera ch'els dattian gronda paisa da sensibilisar scolaras e scolars d'avair quità da l'ambient. Emnas da skis pussibilteschan da far quai a moda pratica.
Littering u sfarlattar aua chauda na datti betg durant noss champs.
Champs da scolas n'èn betg uschè periclitads
Tenor Mauro Gotsch – manader da project en la sparta da turissem da la FHGR – èn champs da scolas ideals per sviluppar in turissem persistent en Grischun. Tar tals giasts sa tractia da gruppas grondas che sa muventan per gronda part cun mezs da transport public. Supplementar stettian scolas per usit almain in'emna al medem lieu, fan diever da butias ed albierts locals ed èn uschia ina plivalur per il maletg dal vitg. La malsgirezza da naiv saja natiralmain era tar els tema, ma era qua sa chattian variantas alternativas, per che scolas na stoppian betg desister dal tuttafatg da talas emnas sportivas en territoris muntagnards.