Sco quai che Schadegg ha ditg envers RTR, giavischia la populaziun ina midada. En l’emprim scrutini haja el cuntanschì quai ch’el vuleva. Il resultat mussia, che sche la populaziun avess vulì la presidenta actuala, alura fissi ella era vegnida elegida en l’emprim scrutini. Gabriella Binkert Bechetti ha ditg, ch’ella veglia persvader la populaziun cun quai ch’ella haja cuntanschì fin oz. Il sviament da Santa Maria saja ussa publitgà, i saja in dals pli gronds projects dals ultims 30 onns en Val Müstair.
Tge di la populaziun?
En ina pitschna enquista che RTR ha fatg han diversas persunas exprimì ch’ellas dettian la vusch a la presidenta actuala, adherents da Schadegg n’ha RTR betg chattà. Ina persuna è vi dal ponderar a tgi dar la vusch, eventualmain faschess bain ina midada al timun da la vischnanca Val Müstair ha ella ditg. In’auter dals dumandads ha ditg, ch’el sa fetschia quitads per il rumantsch, sche Schadegg ch’è da lingua tudestga vegniss elegì sco president communal.
Elecziun è la dumengia
Il segund scrutini per il presidi da Val Müstair è la dumengia, ils 13 d’october a l’urna.
