Be ina singula vusch ha mancà a la presidenta communala en uffizi per sia reelecziun. I dat pia in segund scrutini en trais emnas. I candideschan anc Thomas Schadegg e Gabriella Binkert Becchetti, cunquai che Ivo Lamprecht è sa retratg.
Anna Caprez, producenta Engiadina analisescha la situaziun.
Ina singula vusch ha mancà a Gabriella Binkert Becchetti per sia reelecziun, daco?
Quai è grev da valitar. Sch'ins guarda dentant sin tut las vuschs, vesan ins, che quasi la mesadad dals votants e da las votantas ch'èn ids a l'urna n'han betg dà la vusch a la presidenta communala en uffizi. Plinavant èsi remartgabel che 43 persunas han inditgà autras persunas, e ch'auters han schizunt mess en vid.
Datti pia ina tscherta malcuntentientscha en Val Müstair?
Quai pon ins segir vesair tar la mesadad da la populaziun che n'ha betg dà la vusch a Gabriella Binkert Becchetti. Che l'atmosfera en suprastanza actuala n'è betg la meglra han ins udì durant il discurs da podi cun ils trais candidats. Là è la collavuraziun stada en il center, e quella è vegnida crititgada fermamain dals dus candidats Ivo Lamprecht e Thomas Schadegg. Els dus n'èn dal reminent era betg s'inscuntrads oz cun Gabriella Binkert Becchetti tar la chasa communala a Müstair per ina intervista.
Las opiniuns van era en duas differentas direcziuns tar la dumonda, co che projects impurtants per la Val Müstair avessan da vegnir schliads ils proxims onns. Jau pens vi dal sviament da la fracziun da Sta. Maria, la renovaziun da l'albiert per la giuventetgna u era la fusiun da las scolas. Tut fatschentas impurtantas ch'ins vegn be d'accumplir, sch'ins collavura e tira vi da la medema suga. E quai na para betg d'esser pussaivel il mument, sch'ins sa che l'armonia en suprastanza n'è insumma betg buna.
Ivo Lamprecht è sa retratg e na va betg pli en la cursa per il presidi en il segund scrutini. Pudess quai uss tuttina anc dar ina cursa stretga?
L'emprima dumonda è quanta glieud che va insumma anc ina giada a vuschar en trais emnas. Plinavant dependi, sche Thomas Schadegg survegn las 100 vuschs dad Ivo Lamprecht, e sche quellas persunas ch'han mess en vid u in candidat selvadi midan anc opiniun. En tutta cas vala la maioritad relativa. Quai munta: Quel che fa las pli bleras vuschs, è per ils proxims quatter onns al timun da la Val Müstair.
Anna Caprez
Producenta Engiadina
