La chasa da scola veglia a Scuol n’ademplescha betg pli las cundiziuns confurmas al temp. La vischnanca da Scuol aveva perquai publitgà il 2024 in’occurrenza publica, gudagnà quell’occurrenza ha la cuminanza da lavur Balasingam Kunz, Gilbert, Merkli e Riker – tut biros d’architectura da Turitg.
Sut il titel «Scola Scuol+» prevesa la vischnanca da modernisar la scola existenta e da plinavant fabritgar novs stabiliments sin l'areal da scola. Scuol ha memia paucs locals d’instrucziun, plinavant èn quels locals existents memia pitschens per in'instrucziun moderna. Gia oz ha la scola stuì prender a fit locals externs en chasas vischinas. L’idea è pia da detretschar la situaziun ed avair ina scola propi grond'avunda per ademplir ils giavischs futurs. Las statisticas d'uffants mussan plinavant che la quantitad da scolaras e scolars s'augmenta ils proxims onns en la fracziun da Scuol.
Nova chasa da scola a Scuol
-
Bild 1 von 3Legenda: Vista sin la scolina Vista sin la scolina Vischnanca da Scuol -
Bild 2 von 3Legenda: Survista da tut igl areal da la scola a Scuol Survista da tut igl areal da la scola a Scuol Vischnanca da Scuol
-
Bild 3 von 3Legenda: Corridor da la nova scola a Scuol Corridor da la nova scola a Scuol Vischnanca da Scuol
La vischnanca da Scuol prevesa d’investir per quest project radund 35 milliuns francs. Ussa vegn il project victur elavurà en detagl. Tenor infurmaziuns da la vischnanca prevesan ins da suttametter il project a la populaziun durant quest’onn.