Trofeo Danilo Re - Parcs da natira europeics sa chattan a Scuol

Bundant 250 persunas fan quest onn part al Trofeo Danilo Re. L’occurrenza annuala è turnada suenter 15 onns puspè en l'Engiadina Bassa. Durant ils quatter dis a Scuol s'inscuntran delegaziuns da 30 differentas zonas da protecziun da la natira ed organisaziuns oriundamain da set pajais alpins.

Curta egliada enavos

L’inscunter era vegni creà pervia dad in mortori. Per betg emblidar la memoria a Danilo Re ch'è mort l'onn 1995 durant sia lavur, è quest inscunter vegnì fundà dad in ami e collega da lavur, Mauro Fissore. Durant 28 onns è el stà l'organisatur è la bun’olma davos l’inscunter. Era ad el han ils responsabels e las responsablas commemorà suenter sia mort da l’onn passa.

In inscunter per discussiunar e cultivar amicizias...

L'emprima saira ha l’act uffizial lieu gì lieu, nua che differents exponents ed exponentas da la politica e dal Parc Naziunal Svizzer, ma era il cor viril dal Parc Naziunal Svizzer, han beneventà ils teams dals parcs. Suenter hai dà sco usità in Buffet Alpin, nua ch'ils differents parcs natirals han preschentà delicatessas da lur regiuns als preschents ed a las preschentas. Igl era medemamain pussaivel durant quest buffet da far viva, sa barattar e far amicizia cun ils auters guardiaparcs e las autras regiuns participantas.

... ma era per sa mesirar

Il segund di è stà emplenì cun simposis, discussiuns e referats dad experts ed expertas, ma era dals guardiaparcs. Ils organisaturs e las organisaturas numnan quai «Ranger Seminars». Igl ha era dà trenaments sin la naiv per las quatter disciplinas: passlung, slalom gigant, tir cul schluppet d’aria ed ascensiun da la muntogna cun ils skis da tura. La fin vai alura per il Trofeo Danilo Re en las quatter disciplinas – quai però en concurrenza amicabla.

Impressiuns da l'emprima saira dal Trofeo Danilo Re